Azərbaycan,Bakı, 3 iyun /Trend, müxbir Ü.İsmayılova/
Azərbaycan Qiymətli Kağızlar üzrə Dövlət Komitəsi "Azal Sığorta" ASC sığorta şirkətinin 2 milyon manat məbləğində sadə adlı sənədsiz səhmlərinin emissiya prospektini qeydiyyata alıb. Bu barədə Bakı Fond Birjasının (BFB) cümə axşamı yaydığı məlumatında deyilir. Səhmlərin yerləşdirilməsinə iyunun 18-dən başlanılacaq.
Yerləşdirmə BFB-də açıq abunə metodu ilə aparılacaq. "Azal Sığorta" həmçinin BFB-yə onun səhmlərinin fond birjasının qeyri-kotirovka vərəqinə daxil edilməsi ilə bağlı da müraciət edib.
Hər birinin nominal dəyəri 400 manat olan cəmi beş min qiymətli kağız qeydiyyata alınıb. Emissiyanın yerləşdirilməsi nəticəsində şirkətin nizamnamə kapitalı hazırkı 2 milyon manatdan 4 milyon manata qədər artacaq.
Şirkətdən bildiriblər ki, ümumi kapitalın məbləği hələ dəqiqləşdirilir. Bundan sonra şirkətin səhmdarları Maliyyə Nazirliyinə mayın 7-də dayandırılan sığorta fəaliyyəti üzrə lisenziyanın bərpası ilə bağlı müraciət edəcəklər.
Belə qərar sığorta qanunvericiliyi ilə müəyyən edilmiş ödəniş qabiliyyəti və sığortaçıların maliyyə sabitliyi normativlərini yerinə yetirməsi üzrə dövlət sığorta nəzarəti orqanının göstərişlərinin yerinə yetirilməməsi ilə bağlıdır.
Bundan əvvəl, aprelin sonlarında ölkənin sığorta bazarında fəaliyyətini dayandıran "Azİnvest Sığorta" ASC-yə sığorta fəaliyyəti üzrə müddətsiz lisenziyanın verilməsindən imtina edilmişdi.
"Sığorta fəaliyyəti haqqında" qanuna uyğun olaraq, 2010-cu il yanvarın 1-dən sığorta şirkətləri ümumi kapitalı iki milyon manatadək çatdırmalıdır.
Nəticədə, adları çəkilən üç şirkətin fəaliyyəti dayandırılıb. Ölkənin sığorta bazarında 24 şirkət qalıb.
Hava nəqliyyatı sığortası üzrə ixtisaslaşmış "Azal Sığorta" şirkətinin əsası 1995-ci ildə qoyulub. Şirkətin təsisçisi "Azərbyacan Hava Yolları" QSC-dir. Bu gün şirkət ölkənin sığorta bazarında sığorta haqqının həcminə görə liderdir. Birinci rübün yekun nəticələrinə əsasən, şirkətin sığorta haqları 11,86 milyon manat təşkil edib.
İyunun 3-nə olan rəsmi məzənnə 0,8036 AZN/USD təşkil edir.