Azərbaycan, Bakı, 21 iyun /Trend, müxbir İ.Xəlilova/
Azərbaycanın İslam Konfransı Təşkilatına (İKT) üzv olan ölkələrlə əməkdaşlığının inkişafı xarici əlaqələrin prioritet istiqaməti kimi strateji əhəmiyyətə malikdir. Bu barədə iqtisadi inkişaf naziri Şahin Mustafayev Ticarətin Maliyyələşdirilməsi üzrə Beynəlxalq İslam Korporasiyasının iclasında bəyan edib. Tədbir İKT-yə üzv olan ölkələr arasında ticarətin möhkəmləndirilməsi üçün yol xəritəsinin hazırlanmasına həsr olunub.
"Azərbaycan müstəqillik qazandıqdan sonra MDB ölkələri arasında ilk olaraq 1991-ci ildə İKT-nin üzvü oldu, - nazir deyib. - 1992-ci ildə İslam İnkişaf Bankına üzv olduğu andan ilk dəfə Azərbaycan bu il İİB-nin illik iclasına sədrlik edir".
Mustafayev iştirakçıları son altı ildə ölkənin əldə etdiyi iqtisadi uğurlar barədə məlumatlandırıb. 2004-2009-cu illərdə ölkə iqtisadiyyatı 2,8 dəfə, sənaye istehsalı 4,2 dəfə, büdcə xərcləri 7 dəfə artıb, yoxsulluğun səviyyəsi 4 dəfə azalıb. Bu dövr ərzində ölkənin xarici ticarət dövriyyəsi 2,9 dəfə, o cümlədən ixrac 4,1 dəfə artıb.
Nazirin sözlərinə görə, 2009-cu ildə ölkənin xarici ticarət dövriyyəsində İKT ölkələrinin payı 14,2 faiz, 2010-cu ilin 4 ayı ərzində isə 17,9 faiz təşkil edib. Onun fikrincə, diqqətəlayiqdir ki, bu il Azərbaycanın İKT üzvü olan ölkələrlə ticarət dövriyyəsi 2,2 dəfə artıb.
"Azərbaycan xarici ticarətdə liberal rejimə malikdir, məhz ixrac rüsumları ləğv edilib, idxal gömrük rüsumlarının maksimum dərəcəsi 15 faiz təşkil edir, - nazir bildirib. - Bununla yanaşı, Azərbaycan ticarətin genişləndirilməsi üçün inkişaf etmiş ölkələrin preferensiyalarının ümumi sisteminə qoşulmaq üçün zəruri addımlar atır".
Azərbaycan artıq Aİ ölkələri, ABŞ, Kanada, Türkiyə, Yaponiya, İsveçrə və Norveç kimi ölkələrin GSP proqramlarına qoşulub. Nazirin sözlərinə görə, bu, Azərbaycanda istehsal olunan məhsulların daha aşağı gömrük rüsumları ilə bu ölkələrə ixracı üçün imkan yaradır. Bununla yanaşı, ölkə MDB-nin doqquz ölkəsi və Gürcüstanla ikitərəfli ticarət sazişlərinin imzalanması əsasında Azərbaycan mallarının rüsumsuz ixracı imkanlarına malikdir.
Görülən tədbirlər nəticəsində 2010-cu ilin ilk beş ayı ərzində Azərbaycanın xarici ticarət dövriyyəsi ötən ilin analoji dövrü ilə müqayisədə 53,5 faiz, o cümlədən ixrac 78 faiz, idxal isə 4,4 faiz artıb. Bu dövrdə qeyri-neft sektoru iki dəfədən çox artıb.
"Azərbaycan hökumətinin iqtisadi siyasətinin əsas prioritet istiqamətlərindən biri xarici ticarətin daha çox liberallaşdırılması, qeyri-neft sektorunun artırılmasıdır", - nazir bildirib.
O, həmçinin İKT-nın üzvü olan ölkələrlə ticarətin genişləndirilməsi üçün böyük imkanların mövcud olduğunu qeyd edib, ilk dəfə olaraq Beynəlxalq İslam Korporasiyasının 2015-ci ilədək İKT ölkələri arasında ticarətin 20 faizədək artırılması üzrə qəbul etdiyi tədbirləri yüksək qiymətləndirib.
Tədbir banka üzv olan 56 ölkənin maliyyə, iqtisadiyyat və planlaşdırma nazirlərinin iştirakı ilə iyunun 23-24-də keçiriləcək İİB İcraedici Direktorlar Şurasının 35-ci illik iclası çərçivəsində keçirilir.
