Аzərbaycan, Bakı, 22 iyun /Trend, müxbir Ü.İsmayılova/
Standartlaşdırma, Metrologiya və Patent Üzrə Dövlət Komitəsinin rəsmi nəşri olan "İxtiralar. Faydalı modellər. Sənaye nümunələri" bülleteninin yeni sayı çapdan çıxıb. Bülletenə Azərbaycan Respublikasının Dövlət Reyestrinə daxil edilmiş ixtira, sənaye nümunəsi, faydalı model patentləri haqqında ətraflı məlumat daxil edilib.
"Məlumat üçün bildirək ki, cari ilin ilk 3 ayı ərzində komitə tərəfindən 34 ixtiraya, 3 faydalı modelə, 10 sənaye nümunəsinə patent verilib", - bu barədə çərşənbə axşamı Dövlət Komitəsindən verilən məlumatda deyilir.
İxtiralara misal olaraq suvarma şırımları açmaq və torpaq becərmək üçün alət; daşlı torpaqları becərmə üsulu; ticarət-nəqliyyat qoşqusu; diş protezinin hazırlanma üsulu; hidrogenin alınması üçün katalizator; fosfor-kaliumlu gübrənin alınma üsulu; dizel yanacağının alınma üsulu; benzinlərin saxlanılması zamanı buxarlanma itkilərinin azaldılma üsulu; suaşıran bənd; maqnitoelektrik mühərrik və s.-ni göstərmək olar.
Külək enerjisı qurğusu; qoruyucu qurğulu siyirtmə; xam pambığın qurudulması və təmizlənməsi üçün qurğu isə faydalı model olaraq reyestrə daxil edilib.
Patent almış sənaye nümunələrinə misal kimi, müxtəlif qablaşdırma qutularını; butulkaları; havatəmizləyən qurğuları; ictimai nəqliyyat dayanacağı üzərindəki talvarın müxtəlif variantlarını göstərmək olar.
