Azərbaycan, Bakı, 22 iyun /Trend, müxbir N.İsmayılova/
Azərbaycanın iqtisadi inkişafı, açıq biznes mühiti və iqtisadiyyatının yüksək artım tempi xarici investorların bazara daxil olmasına imkan yaradır. Bu fikirləri Özəl sektorun inkişafı üzrə İslam Korporasiyasının icraçı direktoru Xalid əl-Əbudi çərşənbə axşamı Azərbaycan və digər MDB ölkələrinin biznes və investisiya üzrə keçirilən konfransının yekunlarına həsr edilən mətbuat konfransında səsləndirib.
"Azərbaycan regionun investisiya mərkəzi ola bilər", - o bildirib.
Onun sözlərinə görə, ölkə iqtisadiyyatının gəlirli sektoru kənd təsərrüfatıdır, ələlxüsus da məhsulun yenidən emalı və logistik əməliyyatlar, eləcə də ölkənin coğrafi vəziyyətinə və iqliminə görə turizm və maliyyə sektoru hesab edilir.
"Azərbaycan bankları yüksək likvidliyə malikdirlər və Azərbaycan Mərkəzi Bankı tərəfindən fəaliyyətə düşüncəli nəzarət var. Lakin Azərbaycanda bankların kapital xərcləri yüksək səviyyədədir və onların göstərdikləri xidmət də kifayət qədər bahalıdır. Odur ki, onlar daha da diversifikasiyalaşdırılmalı və aşağı endirilməlidirlər", - o qeyd dib.
Özəl sektorun inkişafı üzrə İslam Korporasiyası İslam İnkişaf Bankının tərkib hissəsi olmaqla, çoxşaxəli təşkilatdır.
Özəl sektorun inkişafı üzrə İslam Korporasiyası İİB-nin İcraedici Direktorlar Şurası tərəfindən 1999-cu ildə bankın Ciddədə keçirilən 24-cü illik toplantısında təsis edilib. Korporasiyanın mənzil-qərargahı Səudiyyə Ərəbistanının Ciddə şəhərindədir.
Korporasiyanın səlahiyyət sahəsinə üzv ölkələrdə şəriət hökmlərinə əsasən, özəl sektorun layihələri üçün maliyyələşmənin təmin edilməsi üzrə özəl sektorun inkişaf etdirilməsi daxildir. Özəl sektorun inkişafı üzrə İslam Korporasiyası hökumət və özəl qurumlara özəl şirkətlərin yaradılması, genişləndirilməsi və modernləşdirilməsi üçün məsləhətlər də verir.
