Azərbaycan, Bakı, 25 iyun /Trend, müxbir N.İsmayılova/
Dünya Bankının Cənubi Qafqazda maliyyə proqramı və maliyyə məsələləri üzrə əlaqələndiricisi Maykl Edvardsın başçılıq etdiyi missiya iyunun 25-dən iyulun 1-dək Bakıda olacaq. Bu barədə cümə günü bankın Bakı nümayəndəliyindən bildiriblər.
Səfərin başlıca məqsədi bankın ölkənin bank sektorunda həyata keçirdiyi layihələrin tətbiqi, xüsusilə də maliyyə xidmətlərinin inkişafı üzrə layihələrlə tanışlıq təşkil edir. Bu layihə çərçivəsində Azərpoçtun fəaliyyətində maliyyə xidmətlərinin göstərilməsi sahəsində risklərin tənzimlənməsinin tələblərə cavab verməsi şəklinə gətirilməsi nəzərdə tutulur.
Bundan başqa, DB missiyasının səfəri çərçivəsində Azərbaycanın Qiymətli Kağızlar üzrə Dövlət Komitəsinin təşəbbüskarı olduğu kapital bazarının inkişafı ilə bağlı danışıqlara başlanılması gözlənilir. Layihə çərçivəsində Azərbaycan qiymətli kağızlar bazarının ticarət sisteminin yeni arxitekturasının yaradılması nəzərdə tutulub. Layihə Bakı Fond Birjasının ticarət sisteminin təkmilləşdirilməsi ilə yanaşı, Milli Depozitar Mərkəzin sistemini, qiymətli kağızlar bazarının peşəkar iştirakçılarını, lisenziyalı proqram təminatının alınmasını əhatə edəcək. Əsas komponenti ölkə poçt şəbəkəsinin müasirləşdirilməsi olan maliyyə xidmətlərinin inkişaf üzrə layihənin ümumi dəyəri 17,5 milyon dollar təşkil edəcək. Bunlardan 12,25 milyon dollar DB-nin kredit payına, qalan hissə isə Azərbaycan hökumətinin payına düşür. İsveçrə hökuməti layihənin həyata keçirilməsi üçün 612 min dollar dəyərində texniki kömək göstərib. Adıçəkilən layihənin həyata keçirilməsi əlavə vəsaitləri cəlb etmədən texniki prosesin tamamlanması məqsədilə cari ilin yayınadək uzadılıb.
Layihənin həyata keçməsi nəticəsində elektron ticarət sistemi yaradılacaq. Bu sistem Mərkəzi Bankda fəaliyyət göstərən ödəmə sistemi ilə uyğunlaşdırılacaq. Bu, Bakı Fond Birjasında qiymətli kağızlarla aparılan ticarəti onlayn rejimdə, eləcə də qiymətli kağızların verilməsi üzrə hüququ elektron formatda etməyi təmin edəcək.
