Аzərbaycan, Bakı, 15 iyul /Trend/
Azərbaycandan Rusiya istiqamətində qatarların hərəkətində Dağıstanın dəmiryol xəttində baş vermiş partlayışla bağlı problem yaranmayıb, - cümə axşamı "Azərbaycan Dəmir Yolları" QSC-nin mətbuat xidmətinin rəhbəri Nadir Əzməmmədov deyib.
Onun sözlərinə görə, Bakı-Tümen və Bakı- Rostov qatarları qrafik üzrə yola düşüb. Hal-hazırda partlayış yerində artıq bir yol xətti işləyir.
"Bakı- Tümen və Bakı- Rostov qatarları qəza sahəsinə çatdıqda, orada artıq bütün hərəkətlər bərpa olunacaq. Bu, Bakı vaxtı ilə 12:00 radələrinə təsadüf edəcək", - Əzməmmədov deyib.
Həmçinin, Moskva-Bakı və Tümen-Bakı sərnişin qatarları artıq Bakıya gəlib çatıb.
Dağıstanda Tarki-Manas yolunda lokomotiv və iki qum vaqonu partlayıb.
Partlayış Bakı vaxtı ilə 5:50-də baş verib. Partlayıcı qurğu lokomotiv və qum yükləmiş iki vaqondan ibarət bufer qatarı keçən zaman işə düşüb, - məlumatı "İnterfaks" yayıb.
Həmçinin, məlumatı Mahaçqala nəqliyyatında daxili işlər idarə heyətinin növbətçi hissəsindən də dəqiqləşdirərək bildiriblər ki, bu, qumladolu ikiplatformalı zirehli lokomotiv olub.