Azərbaycan, Bakı, 3 avqust /Trend, müxbir N.İsmayılova/
"Royal Bank" 2011-ci ildə "American Express" sisteminə qoşulmaq niyyətindədir. Bu barədə bankın İdarə Heyətinin sədri Samir Əkbərov bildirib.
"American Express" sisteminə qoşulmaq gündəlikdədir, plana görə, onun 2011-ci ilin ortalarında baş tutacağı gözlənilir", - Əkbərov bildirib.
Onun sözərinə görə, bank artıq sistemlə tanışlığı və lazımi danışıqları həyata keçirib. Lakin hələ konkret qərar qəbul olunmayıb.
Bu günədək "Royal Bank" 21 min plastik kart buraxıb. Bankın biznes-planı onların yaxın iki-üç il ərzində 200-300 min vahidədək çatdırılmasına yönəlib.
Bank 2 avqust 1993-cü il tarixində "ÖZ BANK" adı altında səhmdar-kommersiya bankı kimi yaradılıb. 2006-cı ildə Bakı Fond Birjasında bank səhmlərinin göstərilməsi ilə əlaqədar, "Royal Bank"ın rəsmi statusu "Açıq Səhmdar Cəmiyyəti"nə dəyişilib.
"American Express" (AmeEx) - Nyu-Yorkda yerləşən qlobal maliyyə xidmətləri şirkətidir. Şirkətin tanınmış məhsulları kredit kartları, AMEX kartları və yol çekləridir.
