Azərbaycan, Bakı, 19 avqust /Trend, müxbir N.İsmayılova/
2010-cu ilin birinci yarısında Azərbaycanda bank aktivlərinin gəliri 1,2 faiz olub. Bu göstərici 2009-cu ilin müvafiq dövründə 3,1 faiz təşkil edib. Bu barədə Mərkəzi Bankın cari ilin altı ayı ərzində maliyyə sabitliyi üzrə açıqladığı hesabatda deyilir.
Kapitalın gəliri ötənilki 21,2 faiz müqabilində 8,8 faiz təşkil edib.
Ölkə bank sisteminin gəliri (vergilər ödənilməmişdən əvvəl) ilin birinci yarısında 80,8 milyon manat, vergilər ödənildikdən sonrakı gəlir isə 70,5 milyon manat təşkil edib.
İlin birinci yarısında bankların faiz xərcləri 18,7 faiz artaraq dövrün sonuna 268 milyon manat olub. Onların aktivlərin ümumi həcmində payı 4,8 faizdən 4,5 faizədək azalıb.
Bank sistemində faiz dərəcələrinin azalması tendensiyası nəticəsində, bankların faiz gəlirləri 1,2 faiz azalaraq, 506,7 milyon manat təşkil edib. Qeyri-faiz gəlirləri 1,9 faiz artaraq, 130,3 milyon manat təşkil edib.
Bankların ümumi gəliri 637 milyon manat, xərcləri isə 477,6 milyon manat olub.
Keyfiyyətsiz aktivlərin ödənilməsi barədə ehtiyatların yaradılması üzrə bankların köçürmələri 70,5 faiz artaraq, 78,8 milyon manat təşkil edib. Lakin bu köçürmələrin aktivlərə nisbəti ötən ilin müvafiq dövrü ilə müqayisədə - 1,3 faiz səviyyəsində dəyişməz qalıb.
Avqustun 19-na rəsmi məzənnə 0,8038 AZN/USD təşkil edir.