...

FATF Azərbaycanın "xüsusi diqqət tələb edən" ölkələr siyahısından çıxarılması imkanını nəzərdən keçirir

Biznes və iqtisadiyyat xəbərləri Materials 7 Sentyabr 2010 19:31 (UTC +04:00)

Azərbaycan, Bakı, 7 sentyabr /Trend, müxbir N.İsmayılova/

İqtisadi Əməkdaşlıq və İnkişaf Təşkilatının Maliyyə Tədbirləri üzrə İşçi Qrupunun (FATF) yüksək səviyyəli nümayəndə heyəti 2010-cu il 7-8 sentyabr tarixlərində Azərbaycana cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə (PL/TMM) sahəsində ölkənin əldə etdiyi nailiyyətlərlə yerində tanış olmaq məqsədilə səfər edəcək. Bu barədə ölkənin Mərkəzi Bankı yanında Maliyyə Monitorinqi Xidmətinin məlumatında deyilir.

FATF 2009-cu ildə 140-a yaxın ölkədə PL/TMM sahəsində boşluqları qiymətləndirib və bu qiymətləndirmə əsasında ölkələri PL/TMM sahəsində mövcud olan risklərinə görə üç qrupa - PL/TMM sahəsində mühüm çatışmazlıqlara malik olması ilə əlaqədar barəsində sanksiyalar tətbiq edilən ölkələr; PL/TMM sahəsində boşluqlara malik olan və bu istiqamətdə FATF ilə əməkdaşlıq etməyən ölkələr; PL/TMM sahəsində boşluqlara malik, lakin onların aradan qaldırılması üçün siyasi iradəyə və xüsusi fəaliyyət planına malik olan ölkələrə ayırıb.

Azərbaycan məhz üçüncü qrupa daxil edilib və boşluqların aradan qaldırılması üçün qarşılıqlı şəkildə razılaşdırılmış fəaliyyət planı təsdiq edilib. FATF-ın 2010-cu ilin iyun ayında keçirilmiş növbəti plenar iclasında aparılan müzakirələr zamanı Azərbaycanın PL/TMM sisteminin inkişafı ilə bağlı tədbirlər planının uğurla icra etdiyi qeyd olunub, o cümlədən milli qanunvericiliyin təkmilləşdirilməsi, habelə Maliyyə Monitorinqi Xidmətinin funksionallığının artırılması ilə bağlı fəaliyyətlər təqdir edilib. Bu qərar 25 ölkə arasında yalnız Azərbaycana və Qətərə aid edilib.

Bu missiyanın nəticəsindən asılı olaraq Azərbaycanın FATF-ın "xüsusi diqqət tələb edən" ölkələrin siyahısından tam olaraq çıxarılacağı gözlənilir.

FATF-ın missiyasının ölkəyə səfəri çərçivəsində Azərbaycan Nazirlər Kabinetində, Mərkəzi Bankda, Milli Təhlükəsizlik Nazirliyində, Maliyyə Monitorinqi Xidmətində, Baş prokuror yanında Korrupsiyaya qarşı mübarizə idarəsində, Qiymətli Kağızlar üzrə Dövlət Komitəsində, habelə bir sıra kommersiya banklarında görüşlər keçiriləcək.

Keçiriləcək görüşlər və aparılacaq müzakirələrin əsas məqsədi Azərbaycanda PL/TMM sisteminin inkişafı ilə əyani surətdə tanış olmaq, müvafiq məsələlər barədə səlahiyyətli orqanlarla müzakirələr aparmaqdır.

İqtisadi Əməkdaşlıq və İnkişaf Təşkilatının Maliyyə Tədbirləri üzrə İşçi Qrupu (FATF) cinayət gəlirlərinin "əldə edilməsi" və terrorizmin maliyyələşməsi ilə mübarizədə kollektiv tədbirlərin hazırlanması və həyata keçirilməsi üçün yaradılan hökumətlərarası təşkilatdır. FATF 1989-cu ildə Parisdə keçirilən "böyük səkkizliyin" sammitinin qərarına uyğun yaradılıb. Hazırda FATF-a 34 iştirakçı daxildir. FATF 1990-cı ildə pul vəsaitlərinin yuyulması ilə mübarizə aparmaq üçün 40 tövsiyə hazırlayıb. 1996-cı və 2003-cü illərdə pulların silinməsi texnologiyasının inkişaf etməsi ilə əlaqədar olaraq onlara yenidən baxılıb. Bundan başqa, FATF 2001-ci ildə terrorizmin maliyyələşdirilməsi ilə mübarizədə doqquz xüsusi tövsiyə də hazırlayıb. O, 2004-cu ilin oktyabrında dünyada dəyişmiş siyasi vəziyyətə uyğunlaşdırılıb. Bu sənədlər pulların silinməsi və terrorizmin maliyyələşməsinin qarşısının alınması üzrə beynəlxalq standartlar kimi qəbul edilib.

Xəbər lenti

Xəbər lenti