Özbəkistan, Daşkənd, 16 sentyabr /Trend, müxbir D.Əzizov/
Sentyabrın 21-23-də Daşkənddə iqtisadi əməkdaşlıq üzrə Özbəkistan-Azərbaycan hökumətlərarası komissiyasının iclası keçiriləcək. Bu barədə Azərbaycanın Özbəkistandakı səfirliyindən məlumat verilib.
Səfirliyin məlumatına görə, Azərbaycanın müxtəlif nazirlik və idarələrinin nümayəndələrinin daxil olduğu nümayəndə heyətinə Baş nazirin birinci müavini Yaqub Eyyubov rəhbərlik edəcək.
İclasda Özbəkistan ilə Azərbaycan arasında ikitərəfli ticari-iqtisadi əməkdaşlığın genişləndirilməsi üzrə məsələlərin geniş müzakirəsi planlaşdırılır.
Özbəkistan-Azərbaycan hökumətlərarası komissiyasının sonuncu iclası 2008-ci ilin sentyabrında Bakıda keçirilib.
Rəsmi statistik məlumatlara görə, Özbəkistan ilə Azərbaycan arasında ticarət mübadiləsi 2009-cu ildə 35 faizə enərək 42 milyon dollar, 2010-cu ilin yanvar-iyun aylarının yekunlarına əsasən, 7,9 milyon dollar təşkil edib. Bu göstərici ötən ilin analoji dövründə 24,9 milyon olub.
