Azərbaycan, Bakı, 24 sentyabr /Trend, müxbir N.İsmayılova/
Bank olmayan kredit təşkilatı "TBC Kredit"in kredit portfelinin həcmi il ərzində 18 faizdən çox artaraq sentyabrın 1-nə 19 milyon dollar olub. Bu barədə cümə günü təşkilatdan bildiriblər.
"Kredit portfelinin ümumi həcmində biznes kreditlərinin payına 56 faiz, ipoteka kreditlərinə 29 faiz, istehlak kreditlərinə isə 16 faiz düşür", - "TBC Kredit"dən bildiriblər.
2009-cu ilin əvvəlində biznes kreditlərinin payına 44 faiz, ipoteka kreditlərinə 41 faiz, istehlak kreditlərinə isə 15 faiz düşüb.
Təşkilatın aktiv kreditlərinin sayı hesabat tarixinə 1766 təşkil edib. Bu göstərici 2009-cu il sentyabrın 1-nə 1322 olub.
Şirkətin müştəriləri arasında bütün məqsədlər üçün verilən (səyahət, toyların təşkili, mebel və texnika alışı) girovsuz istehlak kreditləri daha çox məşhurdur. Bu kreditin maksimum məbləği 18 aylıq müddət olmaqla 5 min manat təşkil edir.
İpoteka kreditləri üzrə illik faiz dərəcəsi 10 illik kredit müddətinə 18 faiz təşkil edir. Bununla yanaşı, kreditin maksimum məbləği 200 min dollardır.
Biznes kreditləri üzrə faiz dərəcəsi orta hesabla illik 22 faiz təşkil edir, kreditin maksimum məbləği 500 min manata çatır. Girovsuz mikrobiznes kreditlərinin maksimum məbləği 10 min manat təşkil edir.
"TBC Kredit" bank olmayan kredit təşkilatı Azərbaycanda 1999-cu ildən fəaliyyət göstərir. 2007-ci ilin dekabrından şirkətin 75 faizi Gürcüstanın aparıcı bankı "TBC Bank"a, 25 faizi isə "ShoreBank International Ltd" şirkətinə məxsusdur.
Sentyabrın 24-nə olan rəsmi məzənnə 0,8030 AZN/USD təşkil edir.
