Azərbaycan, Bakı, 16 oktyabr /Trend, müxbir N.İsmayılova/
Azərbaycanda iri sement istehsalçısı "Qaradağ Sement" ASC səhmdarlarının növbədənkənar yığıncağı noyabrın 25-də keçiriləcək. Bu barədə şirkətin şənbə günü rəsmi qəzetdə dərc edilən məlumatında deyilir.
Yığıncaq Bakı şəhəri, Yasamal rayonu, K.Kazımzadə küç, 118-560 ünvanında yerləşən "Qafqaz Point" hotelində saat 10:00-da keçiriləcək. Səhmdarların qeydiyyata alınması noyabrın 25-də "Qafqaz Point" hotelində saat 08:00-dan 09:30-dək aparılacaq.
"Qaradağ Sement" ASC Azərbaycanda sement və klinkerin yeganə istehsalçısıdır. Şirkət ölkə bazarının böyük hissəsini həm yerli, həm də beynəlxalq standartlara cavab verən yüksək keyfiyyətli məhsulla təmin edir.
Qaradağ sement zavodunun əsasında 1999-cu ildə yaradılan "Qaradaq Sement" ASC qısa müddət ərzində Azərbaycanın daxili bazarında böyük uğurlar qazanıb. "Qaradağ Sement" SC-nin səhmdarları İsveçrənin "Holcim Group" şirkəti (69,4 faiz), AYİB və Azərbaycan İnvestisiya Şirkəti (hərəsi 10 faiz) və özəl səhmdarlardır (10,6 faiz).
Hazırda "Qaradağ Sement" ASC-nin məhsulundan Azərbaycanda özündə qlobal enerji layihələrini də birləşdirən böyük tikinti layihələrinin həyata keçirilməsində geniş istifadə olunur.
