Azərbaycan, Bakı, 25 oktyabr /Trend, müxbir S.Süleymanov/
Nəqliyyat sahəsində əməkdaşlıq və Qazaxıstan taxılının ixrac marşrutlarının inkişafı Astana və Bakının iqtisadi münasibətlərini daha yüksək səviyyəyə qaldıra bilər. Azərbaycanın Qazaxıstandakı yeni səfiri Zakir Həşimov belə hesab edir.
"Azərbaycan və Qazaxıstan iqtisadiyyatının ilk növbədə enerji resurslarına əsaslanmasına baxmayaraq, hər iki ölkə iqtisadi münasibətlərin artırılması üçün geniş imkanlar spektrinə malikdir, - səfir Trend-ə müsahibəsində bildirib. - Güman edirəm ki, ölkəmizin nəqliyyat imkanları Azərbaycan və Qazaxıstan arasında daha böyük inteqrasiyaya səbəb olacaq".
Azərbaycan və Qazaxıstan arasında ənənəvi əməkdaşlıq sahələri Qazaxıstan neftinin və neft məhsullarının Bakı - Qara dəniz nəqliyyat dəhlizi ilə nəqlidir. Ölkələr arasında bərə xətti də var. Həm Azərbaycan, həm də Qazaxıstan TRACECA (Avropa-Qafqaz-Asiya) nəqliyyat dəhlizinin iştirakçılarıdır.
Səfir əməkdaşlıq üçün daha perspektiv sahə kimi Qazaxıstan taxılı üçün ixrac marşrutlarının inkişaf etdirilməsini hesab edir.
"Qazaxıstan dünyanın vacib taxıl ixracatçısı olmaqla, yeni ixrac marşrutlarının yaradılmasında maraqlıdır, - Həşimov bildirib. - Bakıdakı taxıl terminalı ixrac marşrutunun vacib hissəsidir".
"Bakı Taxıl Terminalı" BM 2007-ci ilin aprelin 4-də açılıb. Terminalın tikintisi 6 milyon dollara başa gəlib. Terminal taxılın müvəqqəti saxlanması üçün ümumu həcmi 15 min ton olan beş silosla təchiz edilib. Taxılın göndərilməsi üzrə terminalın istehsal gücü saatda 300 tondur, göndərilmənin illik həcmi 500 min tonadəkdir. Azərbaycanın yüksək keyfiyyətli taxılla təlabatının ödənilməsi ilə yanaşı, Bakı terminalı Qazaxıstan neftinin Qafqaz, Qara dəniz regionu ölkələrinə və Aİ ölkələrinə yenidən ixracında vacib elementdir.
"Bakı Taxıl Teminalı" MMC Azərbaycan-Qazaxıstan birgə müəssisəsi Azərbaycan və Qazaxıstanın ikitərəfli qarşılıqlı iqtisadi əməkdaşlığı çərçivəsində yaradılıb.
Taxıl terminalının ərazisində yeni dəyirman kompleksi fəaliyyətə başlayıb. 150 ton istehsal gücünə malik dəyirman kompleksi Azərbaycan və Qazaxıstan tərəfindən paritet əsasda yaradılıb.
"Azərbaycanda istehsal olunan kənd təsərrüfatı məhsulları Qazaxıstan bazarı üçün böyük əhəmiyyətə malikdir", - səfir vurğulayıb.
Hazırda Azərbaycandan əsasən istilik-enerji kompleksi məhsulları (reaktiv və dizel yanacağı, sürtkü yağları), maşınqayırma (xüsusi avadanlıq və onların ehtiyat hissələri), kimya sənayesi (polietilen, müxtəlif polimer və boyalar) tədarük edilir, Qazaxıstandan isə Azərbaycana taxıl, arpa, un, kimya sənayesi, qara və rəngli metallurgiya məhsulları göndərilir.
Səfirin sözlərinə görə, Qazaxıstan və Azərbaycan arasında iqtisadi əlaqələr dünya maliyyə böhranı dövründə də dinamik inkişaf edib.
"Əminəm ki, yaxın vaxtlarda ölkələrimiz arasında imzalanan sənədlərdə öz əksini tapan, ilk növbədə enerji sahəsində layihələr nəzərə alınmaqla, qarşılıqlı ticarətin səviyyəsi xeyli artacaq", - səfir qeyd edib.
