Azərbaycan, Bakı, 1 dekabr /Trend, müxbir N.İsmayılova/
Dekabrda Avropa Yenidənqurma və İnkişaf Bankı (AYİB) Azərbaycanın iki tərəfdaş bankı ilə ümumi məbləği 15 milyon dollar olan maliyyələşmənin verilməsinə dair kredit sazişi imzalayacaq. Bu barədə çərşənbə günü AYİB-in Bakı nümayəndəliyinin rəhbəri Frensis Deley deyib.
"Ümumilikdə üç kreditin ayrılması planlaşdırılır. Bununla belə, bir banka müxtəlif layihələrin həyata keçirilməsi üçün iki, ikinci bank üçün isə bir kredit xətti açılacaq", - Deley bildirib.
Cari ildə AYİB Azərbaycan iqtisadiyyatına 18 layihənin həyata keçirilməsi üçün artıq 50-60 milyon avroya yaxın investisiya edib. Bunun beş layihəsi ticarətin dəstəklənməsini nəzərdə tutur. 2009-cu ildə AYİB ölkə layihələrinə 240 milyon dollar investisiya yatırıb.
"Gələn il layihələrin olmasından asılı olaraq, bank 10-15 layihənin həyata keçirilməsinə 50-100 milyon dollar investisiya qoymaq niyyətindədir. 2011-ci il üçün layihələrin maliyyələşdirilməsinə prioritet istiqamətlər aqrobiznesə xüsusi diqqətin yetiriləcəyi maliyyə və korporativ sahələr müəyyənləşdirilib", - nümayəndəliyin rəhbəri bildirib.
AYİB ölkədə fəaliyyətə başlayandan Azərbaycan iqtisadiyyatına 110 layihənin həyata keçirilməsi üçün 1,6 milyard dollar investisiya edib. Bankın cari portfeli bir milyard dollar təşkil edir.
İnvestisiyaların 44 faizi Azərbaycanın energetika sektoruna, 23 faiz isə korporativ sektora yönəlib. Maliyyə sektorunda 70 layihə həyata keçirilib. Hazırda AYİB ölkənin doqquz bankı, altı mikromaliyyə təşkilatı və üç bank olmayan kredit təşkilatı ilə əməkdaşlıq edir.
