Azərbaycan, Bakı, 3 dekabr /Trend, müxbir Ü.İsmayılova/
Azərbaycan-Türkiyə sığorta şirkəti "Başak İnam" gələn ildən ölkənin regionlarında filial şəbəkəsini genişləndirmək fikrindədir. Bu barədə cümə axşamı şirkətin idarə heyəti sədrinin köməkçisi Hikmət Allahverdiyev məlumat verib.
"Şirkətin filialları və nümayəndəlikləri, eləcə də agent şəbəkəsi ölkə regionlarının əksəriyyətini əhatə edir", -Allahveriyev bildirib.
Onun sözlərinə görə, bu gündən şirkətin filialları Beyləqanda və Gəncədə fəaliyyət göstərir.
"Şirkət filial şəbəkəsinin genişləndirilməsi, eləcə də biznesin inkişafı üzrə digər tədbirlərin həyata keçirilməsini 2011-ci ildə şirkətin 15 illiyi çərçivəsində planlaşdırıb", - Allahveriyev deyib.
"Başak İnam"ın səhmdarları Groupama Sigorta AŞ (49 faiz) və azərbaycanlı təsisçidir. Birgə sığorta şirkəti 1996-cı ildən fəaliyyətdədir. Şirkət 31 növdə sığorta xidməti göstərir. Şirkətin nizamnamə kapitalı 2 milyon manat təşkil edir.