Azərbaycan, Bakı, 29 dekabr /Trend, müxbir E.İsmayılov/
2011-ci ilin əvvəlindən etibarən Asiya İnkişaf Bankının (AİB) Masallı-Astara avtomobil yolunun inşası layihəsi çərçivəsində tenderin qalibi olmuş "Azərinşaatservis" tikinti şirkəti birinci "A" sahəsi üzrə tikinti işlərinə başlayacaq. Bu barədə çərşənbə günü Azərbaycan Nəqliyyat Nazirliyindəki mənbə deyib.
Onun sözlərinə görə, bu günlərdə podratçı ilə müqavilə imzalanıb.
"Şirkət yolun 22,15 kilometrliyinin tikintisini həyata keçirəcək. Qalan iki məntəqə üzrə podratçı hələ ki müəyyənləşməyib", - mənbə qeyd edib.
Podratçı ikizolaqlı yolu, iki yol keçidini, 10 körpünü, drenaj sistemini və kəsişən yolların üstündən salınan bir körpünü tikməlidir.
Mənbənin dediyi kimi, "A" sahəsində artıq yol sahəsi boyunca yaşayan insanların köçürülməsi ilə bağlı məsələ razılaşdırılıb. "B" və "C" sahələrində torpağın alınması məsələsi açıq olaraq qalır. Bu sahələr üzrə podratçılar 2011-ci ilin birinci rübündə müəyyən ediləcək. AİB-in şərtlərinə əsasən, podratçı yalnız yol yaxınlığında torpaqların alınması prosesi başa çatdıqdan sonra elan edilə bilər.
Masallı-Astara yolu Asiya İnkişaf Bankının 200 milyon dollar dəyərində krediti və Azərbaycan hökumətinin 49 milyon dollarlıq iştirak payı hesabına çəkiləcək.
Masallı-Astara yolu üç hissəyə bölünüb. Digər iki sahə üzrə tenderlər də artıq bağlanıb və indi şirkətlərin təkliflərinin qiymətləndirilməsi prosesi gedir.
Layihə AİB Direktorlar Şurasında 2007-ci il sentyabrın 28-də təsdiqlənib, bankla kreditin verilməsi sazişi isə 2009-cu il yanvarın 15-də imzalanıb. Asiya bankının kredit resursları bankın adi resurslarından hissə-hissə (190 milyon dollar) 24 il müddətinə dördillik güzəştlə və ildə libor+0,6 faizlə verilib. 10 milyon dollar güzəştli kredit isə 32 il müddətinə, səkkizillik güzəştli dövrlə və güzəştli dövr ərzində 1 faizlə, qalan dövrlər üzrə 1,5 faizlə verilib. Kreditin güzəştli hissəsi avtomagistrala birləşən ikinci dərəcəli kənd yollarının yenidən qurulmasına hesablanıb.
Masallı-Astara yeni avtomobil yolunun ümumi uzunluğu 62 kilometr təşkil edəcək.
Masallı-Astara avtomobil yolunun yenidən qurulmasına "Multitranche Financing Facility" (MFF) mexanizmi çərçivəsində 500 milyon dollar məbləğində kredit təqdim edilib və üç yol layihəsinin maliyyələşdirilməsinə hesablanıb. Bu günədək iki layihə razılaşdırılıb, AİB MFF çərçivəsində qalan vəsaitlərdən istifadəyə isə 2014-cü ilədək vaxt ayırıb.