Azərbaycan, Bakı, 5 yanvar /Trend, müxbir Ü.İsmayılova/
Azərbaycanın yeganə dövlət sığorta şirkəti "AzərSığorta" həyat sığortası xidmətləri göstərmək fikrində deyil. Bu barədə çərşənbə günü şirkətin idarə heyəti sədrinin müavini Avtandil Hacıyev bildirib.
"AzərSığorta" yaxın gələcəkdə yalnız qeyri-həyat sığortası istiqamətində fəaliyyət göstərmək fikrindədir", - Hacıyev bildirib.
Sığorta qanunvericiliyinə görə, 2011-ci ilin martından yalnız ixtisaslaşdırılmış şirkətlər Life-sığorta xidmətləri göstərə bilərlər. Buna uyğun olaraq, non-Life şirkətlər belə hüquqdan məhrum olunacaqlar.
"Ayrıca şirkətin yaradılması üçün sərbəst vəsait lazımdır, ötən ilin yekunlarına görə isə "AzərSığorta"nın həyat sığortası sahəsində fəaliyyətə başlamağa yönəldə biləcəyi belə mənfəəti olmayıb", - Hacıyev qeyd edib.
Yeni yaradılan sığorta şirkəti üçün beş milyon manat həcmində kapital formalaşdırmaq vacibdir.
Hazırda Azərbaycanda cəmi iki Life-sığorta şirkəti - "Atəşgah Həyat" və "Qala Həyat" fəaliyyət göstərir, yaxın vaxtlarda daha bir şirkətin - "Paşa Həyat"ın lisenziya alacağı gözlənilir.
"AzərSığorta" SŞ 1992-ci ildə, Sovet İttifaqının süqutundan sonra keçmiş Dövlət Sığorta İdarəsinin bazasında yaradılıb. SŞ respublikanın bütün rayon və şəhərlərində 80 sığorta agentinə malikdir. Şirkət sığortanın 10 icbari və 27 könüllü növü üzrə xidmətlər göstərir. "AzərSığorta"nın nizamnamə kapitalı dörd milyon manatdır.
Yanvarın 5-nə olan rəsmi məzənnə 0,7977 AZN/USD təşkil edir.