Azərbaycan, Bakı, 10 yanvar /Trend, müxbir Ü.İsmayılova/
Azərbaycan Turizm Assosiasiyası (AZTA) ölkənin İqtisadi İnkişaf Nazirliyinə turizm şirkətlərinin fəaliyyətinin birgə monitorinqi ilə bağlı müraciət edib. Bu barədə bazar ertəsi AZTA rəhbəri Nahdi Bağırov deyib.
"Monitorinqin keçirilməsində əsas məqsəd paytaxtda lisenziyasız fəaliyyət göstərən turizm şirkətlərinin aşkar olunmasıdır", - Bağırov bildirib.
Onun sözlərinə görə, göstərilən xidmətlərin keyfiyyəti də monitorinqin predmeti olacaq.
"Bu monitorinq başa çatdıqdan sonra ölkə regionlarındakı turizm obyektlərinin fəaliyyətinin monitorinqi aparılacaq", - Bağırov əlavə edib.
Azərbaycan Turizm Şirkətləri Assosiasiyası 2009-cu ilin yanvarında Mədəniyyət və Turizm Nazirliyinin dəstəyi ilə yaradılıb. İdarə heyətinin tərkibinə "Improtex Travel", "Caspian Travel", "Pasha Travel", "Silkway Travel" və "Euroturizm" şirkətlərinin rəhbərləri daxildir. Ötən ilin oktyabrında AZTA ölkənin Mehmanxanalar Assosiasiyası ilə birləşib.
Assosiasiyanın əsas fəaliyyət istiqamətləri turizm şirkətlərinin maraqlarının qorunması, qanun layihələrinin işlənib hazırlanması, milli turizm şirkətinin yaradılmasına yardım, bazar iştirakçıları üçün təlim və seminarların keçirilməsi üzrə planın hazırlanması, Azərbaycan turizminin illik beynəlxalq sərgilərdə potensial reklam və təşviqatı üçün şərtlərin yaradılması, daxili turizmin inkişafı və dünya bazarında turizm məhsullarının təqdim olunmasıdır.
Həmçinin, fəaliyyət istiqamətlərinə konqres turizminin inkişafı və tətbiqi, idarəetmə və xidmət sahəsində peşəkar kadrların hazırlanmasına yardım, turizm sahəsində adekvat vergi qoyuluşunun yaradılması və normativ nizamlamalar, standartlaşdırma, sertifikatlaşdırma və lisenziyalaşdırmanın inkişafına yardım, beynəlxalq turizm şirkətləri ilə əməkdaşlıq, rəsmi nəşriyyat orqanının yaradılması, hüquqi məsləhətləşmələr sahəsində xidmətlər, normativ-hüquqi bazanın inkişafı çərçivəsində turizm şirkətlərinin hüquqlarının qorunması sahəsində əməkdaşlıq daxildir.
Hazırda Azərbaycanda 200-dən çox lisenziyalaşdırılmış turizm şirkəti fəaliyyət göstərir.