Azərbaycan, Bakı, 5 fevral /Trend, müxbir N.İsmayılova/
Azərbaycan yerli istehsalın artırılması sayəsində tütün məhsulunun idxal həcminin azalması yollarını axtarır. Bu barədə şənbə günü Trend-ə kənd təsərrüfatı nazirinin müavini Bəhram Əliyev deyib.
"Tütün məhsuluna tələbat və onun qiymətləri dünya bazarlarında artır. Lakin biz istehsal həcminin xeyli artırılmasını müzakirə etmirik, çünki tütün insan sağlamlığına ziyan vurur. İdxal həcminin azaldılmasının yerini doldurmaq üçün yerli istehsal ərazilərinin artırılması ilə bağlı ideyalar var", - Əliyev bildirib.
2011-ci ilin əvvəlindən Azərbaycanın ticarət obyektlərində siqaretin qiymətinin 0,15-0,2 manat bahalaşması xarici amillərlə əlaqədardır. Daxili istehsal hesabına Azərbaycanın tütün məmulatlarına olan ehtiyacını 50 faizədək təmin etməsini nəzərə alaraq, dünya bazarlarında qiymətlərin artması ölkəyə idxal edilən məhsullara təsir göstərir.
Yerli bazarın siqaretə olan ümumi tələbatı 10 milyard ədəd və ya ildə 900-1100 min yeşik siqaret təşkil edir (hər yeşikdə 500 qutu siqaret). Lakin keçən il daxili bazarda 2 600 ton siqaret istehsal edilib.
İqtisadi inkişafın yüksək templəri ilə və əhalinin rifahının artması ilə əlaqədar olaraq, azərbaycanlılar əksər mallar üzrə dünya markalarına üstünlük verirlər. Bu, spirtli içkilər, siqaret və başqa tütün məmulatlarına, eləcə də avtomobil nəqliyyatı vasitələrinə və s. aiddir. Azərbaycan əsasən siqaretləri Rusiyadan, İngiltərədən və ABŞ-dan idxal edir.
Azərbaycanda yeganə siqaret istehsalçısı "European Tobacco Baku"dur. O, başqa ölkələrdə tütün müəssisələrinin sayının artması ilə əlaqədar öz məhsulunu yalnız Dubay və Türkiyənin azad iqtisadi zonalarına aparır.
"European Tobacco"nun illik istehsal və daxili bazarda satış həcmi 240-270 min yeşik təşkil edir. "European Tobacco Baku" 1999-cu ildə "Sorex Management Incorporated" tərəfindən özəlləşdirilib.