Azərbaycan, Bakı, 18 fevral /Trend, müxbir N.İsmayılova/
Dünya Bankı (DB) cari ildə Azərbaycanda suvarma sistemlərinin paylaşdırılması və idarə olunması sisteminin təkmilləşdirilməsi üzrə üçüncü layihənin həyata keçirilməsinə başlamağı planlaşdırır. Trend-in məlumatına görə, bu barədə cümə günü bankın Azərbaycandakı nümayəndəsi Cozef Ouen CEIBC tərəfindən keçirilən Azərbaycandakı beynəlxalq investisiya layihələrinin reallaşdırılması imkanları haqqında biznes forumunda bildirib.
"Artıq bir aydır ki, biz ölkə hökuməti ilə danışıqlar prosesindəyik və layihənin yerinə yetrilməsinə başlamaq üçün daha 4-5 ay vaxt lazım olacaq", - Ouen deyib.
DB layihənin həyata keçirilməsinə 80 milyon dollar ayırmağı planlaşdırır, bunun 70 milyon dollarının Beynəlxalq İnkişaf Assosiasiyasının güzəştli maliyyələşdirməsi, 10 milyon dolların isə Beynəlxalq Yenidənqurma və İnkişaf Bankının şərtləri ilə ayrılması nəzərdə tutulub. Layihənin yerdə qalan ümumilikdə 150 milyon dollarlıq hissəsinin dövlət vəsaitlərinin hesabına maliyyələşdiriləcəyi gözlənilir.
Həyata keçirilməsinə 2003-cü ildən başlanılan Azərbaycanda süni suvarma sistemlərinin paylaşdırılması və idarə olunması sisteminin təkmilləşdirilməsi üzrə layihənin müsbət nəticələri onun əhatə zonasının genişləndirilməsi istəyini yaradıb. Bununla əlaqədar ölkə hökuməti DB-yə yeni süni suvarma layihəsinin maliyyələşdirilməsi ilə bağlı xahişlə müraciət edib. Oraya Azərbaycanın 33 rayonu cəlb olunacaq.
Birinci layihənin həyata keçirilməsi nəticəsində 11 rayonda 22 Sudan İstifadə Edənlər Assosiasiyası yaradılıb. Layihə 56 min hektar [yeni layihə 100 min hektarı əhatə edir] ərazinin suvarma sisteminin yaxşılaşdırılmasına imkan verib və 100 min fermeri əhatə edib. Layihənin 23 faiz yerinə yetrilməsindən sonra həmin ərazidə məhsuldarlıq artıb. Bu zaman bir hektar əraziyə çəkilən xərclər 450 dollar təşkil edib. Layihənin ümumi dəyəri 43 milyon dollar təşkil edir ki, bunun 39 milyon dolları DB vəsaitləri hesabına maliyyələşdiriləcək, 4 milyon dollar isə Azərbaycan hökumətinin payı təşkil edir.
Bundan əvvəl bank ölkənin süni suvarma-drenaj sisteminin bərpasına 42 milyon dollar ayırıb. Layihənin ümumi dəyəri 46,86 milyon dollardır. Layihə Samur-Abşeron kanalı boyunca 86 min hektar və Mil-Muğan kollektoru kənarındakı suvarılan 36,5 min hektar ərazini əhatə edir.
