Azərbaycanın turizm şirkətləri Misirə ənənəvi turlar əvəzinə alternativ marşrutlar təklif edirlər
Azərbaycan, Bakı, 23 fevral /Trend, müxbir Ü.İsmayılova/
Azərbaycanın turizm şirkətləri Novruz bayramı günlərində Azərbaycan turistlərinə Misirə ənənəvi turlar əvəzinə alternativ marşrutlar təklif edəcəklər. Bu barədə çərşənbə günü Trend-ə Azərbaycan Turizm Assosiasiyasının (AzTA) rəhbəri Nahid Bağırov deyib.
"Turizm şirkətləri Azərbaycan turistlərinə Dubay, Türkiyə, Tailand, eləcə də Avropa ölkələrinə turlar təklif edirlər", - Bağırov bildirib.
Onun sözlərinə görə, hazırda Azərbaycan turistləri arasında Avropa ölkələrinə olan turlara böyük tələbat var.
Əvvəllər Azərbaycan turistləri arasında Novruz bayramı günlərində Misirə olan turlar populyar olub, lakin bu ölkədəki siyasi vəziyyətlə əlaqədar Misirdəki müxtəlif ölkələrdən olan turistlər təxliyyə edilib. Bu müddət ərzində Misirdə Azərbaycandan turist olmayıb.
Azərbaycan Turizm Şirkətləri Assosiasiyası 2009-cu ilin yanvarında Mədəniyyət və Turizm Nazirliyinin dəstəyi ilə yaradılıb.
Assosiasiyanın əsas fəaliyyət istiqamətləri turizm şirkətlərinin maraqlarının qorunması, qanun layihələrinin işlənib hazırlanması, milli turizm şirkətinin yaradılmasına yardım, bazar iştirakçıları üçün təlim və seminarların keçirilməsi üzrə planın hazırlanması, Azərbaycan turizminin illik beynəlxalq sərgilərdə potensial reklam və təşviqatı üçün şərtlərin yaradılması, daxili turizmin inkişafı və dünya bazarında turizm məhsullarının təqdim olunmasıdır.
Həmçinin, fəaliyyət istiqamətlərinə konqres turizminin inkişafı və tətbiqi, idarəetmə və xidmət sahəsində peşəkar kadrların hazırlanmasına yardım, turizm sahəsində adekvat vergi qoyuluşunun yaradılması və normativ nizamlamalar, standartlaşdırma, sertifikatlaşdırma və lisenziyalaşdırmanın inkişafına yardım, beynəlxalq turizm şirkətləri ilə əməkdaşlıq, rəsmi nəşriyyat orqanının yaradılması, hüquqi məsləhətləşmələr sahəsində xidmətlər, normativ-hüquqi bazanın inkişafı çərçivəsində turizm şirkətlərinin hüquqlarının qorunması sahəsində əməkdaşlıq daxildir.
Hazırda Azərbaycanda 207 lisenziyalaşdırılmış turizm şirkəti fəaliyyət göstərir.
