Azərbaycan, Bakı, 25 fevral /Trend, müxbir Ü.İsmayılova/
2011-ci ilin əvvəlində Bakının daşınmaz əmlak bazarında aktivlik ötən ilin analoji dövrü ilə müqayisədə təxminən 12 faiz fəallaşıb. Ekspert, "MBA Group" konsaltinq şirkətinin baş direktoru Nüsrət İbrahimov belə hesab edir.
"Bazarda nisbi aktivləşmə əsasən ipoteka kreditləşməsi həcmlərinin artımı hesabına müşahidə olunur ki, bunun nəticəsində aktivlik yüksəlib, eləcə də ucuz mənzillərin satışı artıb", - İbrahimov bildirib.
Onun sözlərinə görə, yanvar-fevral aylarında ilkin bazar qismən fəallaşıb (yeni tikililərə maraq artıb).
"Son vaxtlar mənzil almaq istəyənlər bazarda gələcək qiymət dəyişikliklərini gözləməməyə, daşınmaz əmlak obyektləri almağa üstünlük verirlər. Aktivləşmə həm də əhalinin yaranmış vəziyyətə uyğunlaşması ilə bağlıdır", - İbrahimov hesab edir.
O, deyib ki, dünya maliyyə bazarında vəziyyətin yaxşılaşması ölkənin daşınmaz əmlak bazarında canlanmaya təsir edən amillərdən biridir.
Qiymətlərin dəyişməsinə gəldikdə, İbrahimov bildirib ki, onlar yenə də artımdan çox, azalmaya meyllidir.
"Əslində qiymətlər azalmır, azalmaya meyllidir, bazardakı bugünki qiymətləri sabit kimi qiymətləndirmək olar", - İbrahimov hesab edir.
Onun sözlırinə görə, qiymət artımından danışmaq hələ tezdir, birinci yarım ildə bunu gözləmək real deyil, ikinci yarım ildə isə itirilmiş mövqelərin bərpası gözlənilir.
"Azərbaycanın daşınmaz əmlak bazarında ciddi qiymət artımı hələlik gözlənilmir, çünki hazıkı qiymətlər hələ də real alıcılıq qabiliyyətini üstələyir, təklif isə hələ də real tələbdən üstündür", - İbrahimov bildirib.
Daşınmaz əmlak bazarı iştirakçılarının vəziyyətini izah edən İbrahimov qeyd edib ki, ipoteka və bank kreditləşdirməsinin artması ilə qiymətləndiricilər də bu prosesə cəlb olunub, ona görə də onların vəziyyətinin yaxşı səviyyədə olduğunu hesab etmək olar. Rieltorlara tələbat (əmlak alqı-satqısı üzrə əməliyyatlar) ötən ilin analoji dövürünə nisbətən 10-12 fazi artıb.
