Azərbaycan, Bakı, 1 mart /Trend, müxbir N.İsmayılova/
Bakının Qaradağ rayonunda ildə iki milyon ton sement istehsalı gücündə olan yeni "Qızıldaş Sement" zavodunun tikintisi Azərbaycanda sement məhsuluna artan tələbatı ödəməyə imkan verəcək. Bu barədə çərşənbə axşamı "Norm" şirkətinin baş direktoru İsmayıl Ərqovan zavodun tikintisi üzrə Çinin "China Triumph International Engineering Co ltd" (CTIE ) podratçı şirkəti ilə müqavilə imzalanması mərasimində bildirib.
"Bu gün Azərbaycanda bir sement zavodu [Garadagh Cement] fəaliyyət göstərir. O, ildə 1,3 milyon ton sement istehsal edir ki, bu da ölkənin bu məhsula olan tələbatını ödəmir. Ona görə də başqa ölkələrdən sement idxal etmək lazım gəlir. Biz artan tələbatın ödənilməsi məqsədilə zavodun tikilməsi barədə qərar qəbul etdik", - Ərqovan bildirib.
2007-ci ildə ölkəyə 2,2 milyon ton, 2008-ci ildə 3 milyon ton, 2009-cu ildə isə 2,3 milyon ton sement idxal olunub.
"Norm"un layihəsi üzrə zavod 2013-cü ilin sonunda istismara veriləcək. Qeyri-neft sektorunda ən irilərdən biri olan bu layihənin dəyəri vergi ödəmələri ilə birgə 400 milyon dollar həcmində qiymətləndirilir. Ərqovanın sözlərinə görə, layihə üzrə məsləhətçi qismində "Mitsubishi Corporation" çıxış edir.
Şirkətin baş direktoru yeni sement zavodun fəaliyyətinin 10 ili ərzində dövlət büdcəsinə vergi şəklində 200 milyon manata yaxın vəsait ödəcəyini gözləyir.
Martın 1-də rəsmi məzənnə 0,7939 AZN/USD təşkil edir.