Azərbaycan, Bakı, 3 mart /Trend, müxbir Ü.İsmayılova/
Azərbaycanın Dövlət Şəhərsalma və Arxitektura Komitəsi ölkənin üç regionunun inkişaf planını hazırlayır. Bu barədə cümə axşamı dövlət komitəsinin sədr müavini Dövlətxan Dövlətxanov deyib. Azərbaycanın Aran, Quba-Xaçmaz və Gəncə-Qazax iqtisadi zonalarının regional inkişaf planı hazırlanır.
Üç regionun inkişaf planının hazırlanması 2012-ci ilin sonunda başa çatacaq.
Onun szölərinə görə, bu zonaların inkişaf planlarının hazırlanması üzrə 2010-cu ildə açıq tender elan edilmişdi. Tenderin yekunlarına görə, üç şirkət - bir beynəlxalq və iki yerli şirkət seçilib.
Beynəlxalq şirkət Gəncə-Qazax iqtisadi zonasının planını hazırlayacaq. Quba-Xaçmaz zonasının planını yerli şirkət "Renessans studiya", Aran zonasının isə Dövlət Layihə İnstitutu hazırlayacaq.
Dövlətxanovun sözlərinə görə, martda komitə daha iki regionun - Lənkəran və Şəki-Zaqatala iqtisadi zonalarının inkişaf planlarının hazırlanması üçün tender elan edəcək.
