Azərbaycan, Bakı, 3 mart /Trend, müxbir Ü.İsmayılova/
Hazırda Bakı aqlomerasiyasında əhalinin sayı 2,9 milyon nəfər göstəricisinə yaxınlaşır, bu isə yüksək göstərici hesab edilir. Bu barədə cümə axşamı Dövlət Şəhərsalma və Arxitektura Komitəsinin sədr müavini Dövlətxan Dövlətxanov deyib.
"Bu göstəriciyə qaçqın və məcburi köçkünlər də daxildir", - Dövlətxanov qeyd edib. Onun sözlərinə görə, böyük Bakının regional inkişaf planı 253 min hektar torpaq sahəsini əhatə edir. Beş və doqquzmərtəbəli evlərin tikiləcəyi bir hektara 300 nəfər düşür.
Dövlətxanovun sözlərinə görə, şəhərin mərkəzində əhali sıxlığını azaltmaq üçün dövlət komitəsi böyük Bakının regional inkişaf planının təsdiqini gözləməyərək, iki il əvvəl şəhər mərkəzinin ətrafa köçürülməsi layihəsini hazırlamağa başlayıb. Layihənin hazırlanması üzrə işlər may ayına kimi başa çatacaq.
"Bu layihələrin hamısı tanış olmaq və əlavə təkliflərin alınması üçün geniş ictimaiyyətə təqdim ediləcək", - Dövlətxanov deyib və köçürülmənin iqtisadi və texniki baxımdan köhnələn binalara toxunacağını qeyd edib.
