Azərbaycan, Bakı, 3 mart /Trend, müxbir Ü.İsmayılova/
Yaxın beş il ərzində əcnəbi vətəndaşların Azərbaycana üç milyon nəfər sayda axını təmin olunacaq. Bu barədə cümə axşamı Bakıda keçirilən azərbaycanlı sərmayədarların sammitində - "The Azerbaijan Investors' Summit 2011" - Azərbaycan Turizm İnstitutunun rektoru Cəfər Cəfərov bildirib.
"2010-cu ildə Azərbaycana iki milyon xarici vətəndaş səfər edib ki, bunun 1,5 milyon nəfərini turistlər təşkil edib", - Cəfərov deyib.
Onun sözlərinə görə, Azərbaycana böyük turist axınının əsas səbəblərindən biri ölkədə müntəzəm olaraq iri beynəlxalq tədbirlərin keçirilməsidir.
"Bakı regionda beynəlxalq tədbirlərin keçirilməsi mərkəzi olub", - Cəfərov bildirib.
Onun sözlərinə görə, Azərbaycana turist axınına təsir edən mühüm amillər hotellərin tikilməsi, eləcə də turizm şirkətlərinin sayının artmasıdır.
Son bir il ərzində ölkədə turizm obyektlərinin sayı 96-dan 477-dək artıb. Bu gün fəaliyyət göstərən turizm şirkətlərinin sayı 209-dur.
"Azərbaycan əlverişli çoğrafi vəziyyəti və digər göstəricilərinə görə turizm sənayesinin inkişafı üçün ciddi potensiala malikdir", - Cəfərov hesab edir.
Onun sözlərinə görə, eləcə də Azərbaycanda turizmin inkişafı üçün mühüm amillərdən biri də həm Bakıda, həm də ölkənin regionlarında infrastrukturun yaxşılaşması və inkişafı, müasir idman komplekslərinin, muzeylərin, teatrların və digər əyləncə mərkəzlərinin yaradılmasıdır.
Martın 2-3-də Bakıda keçirilən Azərbaycan investorlarının "The Azerbaijan Investror's Summit 2011" sammitində 130-a yaxın Azərbaycan şirkəti və 50 xarici sərmayədar iştirak edib.
Trend BİA da "The Azerbaijan Investors' Summit 2011" sammitinin keçirilməsində informasiya tərəfdaşı kimi çıxış edib.