Azərbaycan, Bakı, 7 mart /Trend, müxbir İ.Xəlilova/
KfW Almaniya İnkişaf Bankı Azərbaycan hökuməti ilə ölkədə kiçik və orta sahibkarlığın dəstəklənməsi üçün 5 milyon avro məbləğində üçüncü güzəştli kreditin konsepsiyasını razılaşdırır. Bu barədə Trend-ə bazar ertəsi KfW-nin Bakı nümayəndəliyinin rəhbəri Natiq Abdullayev deyib [Əvvəllər Azərbaycan bu kreditdən imtina edib].
Hazırda KfW-nin maliyyə layihələri üzrə meneceri Herald Hübner Bakıdadır.
"Azərbaycan hökuməti banka müraciət edərək üçüncü krediti almaq istəyində olduğunu bildirib, - Abdullayev bildirib. - Bununla əlaqədar hazırda İqtisadi İnkişaf və Maliyyə nazirlikləri ilə konsepsiya razılaşdırılır, bundan sonra müqavilə imzalanacaq".
Əvvəlki iki kredit kimi bu vəsaitlər də Almaniya-Azərbaycan Fondu (AAF) vasitəsilə kiçik və orta sahibkarlığın maliyyələşdirilməsi üçün nəzərdə tutulub.
KfW-nin Bakı ofisinin rəhbəri hesab edir ki, dünya maliyyə bazarının indiki vəziyyətində Azərbaycanın kiçik və orta müəssisələrinin maliyyələşdirilməsi üçün ödənişdən 10 illik möhlətlə 40 il müddətinə və illik 0,75 faizlə güzəştli şərtlər əsasında kredit veriləcək.
KfW əvvəlcə sahibkarlığın inkişafı üçün Azərbaycana 20 mln. avro birləşdirilmiş kredit təklif edib. Bu vəsaitin 5 mln. avrosu, əvvəl olduğu kimi, bankın öz vəsaitlərindən, yüngül şərtlərlə - 10 il güzəştli dövr olmaqla, 40 il müddətinə və illik 0,75 faiz dərəcəsi ilə nəzərdə tutulub. KfW vəsaitin qalan hissəsini (15 mln. avro) kapital bazarından götürməlidir və bununla əlaqədar o, kommersiya şərtləri ilə olacaq. Azərbaycan hökuməti kreditin kommersiya hissəsindən imtina edib, lakin güzəştli hissənin alınması ilə bağlı heç cür razılığa gələ bilməmişdi.
Alman bankı 1999-cu ildən AAF-yə iki tranşla 8,7 mln. avro təqdim edib. Bu vəsait artıq mənimsənilib və hazırda banklar revolver hissədən və fondun fəaliyyətə başladığı andan əldə etdiyi gəlirdən maliyyələşdirilir. Hazırda AAF-in cari portfeli orta hesabla 10 milyon avro təşkil edir. Fəaliyyətə başladıqdan ötən ilin dekabr ayınadək Almaniya-Azərbaycan Fondu öz şəxsi vəsaitləri hesabına ümumi məbləği 103 milyon avro olan 26 min krediti maliyyələşdirib.
2001-ci ilin martından AAF-in tərədaşları "Bank of Baku" və "Unibank", 2003-cü ilin yanvarından "Parabank" və "Bank Respublika", 2004-cü ilin sentyabrından "DəmirBank" (əvvəllər Azərdəmiryolbank) və "AGBank", 2006-cı ilin dekabrından "Rabitəbank" və "Muğanbank", 2007-ci ilin fevralından isə "Nikoil Bank"dır.