Azərbaycan, Bakı, 11 mart /Trend, müxbir N.İsmayılova/
Cümə günü İqtisadi İnkişaf Nazirliyinin Sahibkarlığa Kömək Milli Fondunun xətti ilə Yevlax və ətraf rayonların 35 sahibkarına güzəştli şərtlərlə 418 min manat kredit verilib. Trend-in məlumatına görə, bu barədə nazirliyin cümə günü yaydığı məlumatda deyilir.
"Bu vəsaitlər hesabına layihələrin həyata keçirilməsi 70-dən çox yeni iş yerinin açılmasına kömək edəcək", - məlumatda deyilir. Tədbir 180-ə yaxın sahibkarın iştirakı ilə Yevlaxda keçirilib.
Tədbir çərçivəsində "AS İnşaat" MMC-nin illik istehsal gücü 16 min ton dəmir-beton konstruksiyaları olan tikinti materiallarının istehsalı müəssisəsinin fəaliyyətinə baxış keçirilib.
Tədbirdə Yevlax rayonunun iqtisadi potensialına uyğun olaraq, güzəştli kreditlər hesabına maliyyələşdirilməsi nəzərdə tutulan 3 istiqamət üzrə - gündəlik istehsal gücü 10 ton olan müasir çörək zavodunun, illik istehsal gücü 2 min ton olan müasir ətlik istiqamətli quşçuluq təsərrüfatının və faraş tərəvəz məhsullarının yetişdirilməsi üçün müasir istixana kompleksinin yaradılması üzrə nümunəvi investisiya layihələrinin təqdimatı keçirilib.
2011-ci ildə SKMF 23 milyon manat məbləğində 241 kredit verib. Kreditlər yeni texnologiyaların tətbiqinə əsaslanan 17 böyük və irihəcmli investisiya layihəsini - 5 müasir çörək istehsalı müəssisəsi, 2 soyuducu anbar kompleksi, südlük istiqamətli cins heyvandarlıq kompleksi, müasir istixana kompleksi, 3 quşçuluq təsərrüfatı, ət emalı (kəsim sexi) və s. əhatə edib.
Ümumilikdə Fond 2010-cu ildə 1430 sahibkara 115 milyon manat məbləğində güzəştli kreditlər verib. Verilmiş kreditlərin 99,8 faizi regionların payına düşür. Bu kreditlər hesabına 5600-ə yaxın yeni iş yerinin yaradılması nəzərdə tutulur. Bu il Fond güzəştli kreditlərin maliyyələşdirilməsinə 125 milyon manat ayırmağı planlaşdırır.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
