Azərbaycan, Bakı, 19 mart /Trend, müxbir N.İsmayılova/
Beynəlxalq Maliyyə Korporasiyası (BMK) Azərbaycanın aparıcı mikromaliyyə təşkilatı "FINCA Azerbaijan"a 7 milyon dollar verəcək. Bu barədə BMK-nın şənbə günü Trend-ə verdiyi məlumatda deyilir.
Kredit vəsaiti şirkət tərəfindən mikro və kiçik biznesin kreditləşdirilməsini genişləndirmək üçün istifadə olunacaq. Hazırda şirkət dinamik inkişafı davam etdirmək və öz müştərilərinə yeni məhsullar təklif etmək üçün uzunmüddətli maliyyələşdirmənin həyata keçirilməsinə cəhd göstərir.
Layihə "FINCA Azerbaijan"ın şaxələndirmə və maliyyə həcmlərinin artırılması, eləcə də öz aktiv və passivləri ilə daha səmərəli idarəetmə üzrə səylərini dəstəkləyəcək.
BMK Direktorlar Şurası tərəfindən layihəyə baxılması 2011-ci il aprelin 14-nə təyin edilib.
"FINCA Azerbaijan" 1998-ci ildə yaradılıb və 84 milyon dollar həcmində kredit portfeli ilə Azərbaycanın mikromaliyyələşmə bazarının liderləridən biridir.
"FINCA Azerbaijan" mənzil-qərargahı Vaşinqtonda yerləşən "FINCA International" qeyri-kommersiya təşkilatına məxsusdur.
