Azərbaycan, Bakı, 28 mart /Trend, müxbir N.İsmayılova/
"Bank of Baku"nun balans mənfəəti fevral ayı ərzində 2,2 dəfə artaraq martın 1-nə 3,202 milyon manat təşkil edib. Trend-in məlumatına görə, bu barədə bankın bazar ertəsi yaydığı məlumatda bildirilir. Fevral ayının yekunları üzrə bankın gəlirləri 9,945 milyon manat təşkil edib.
Fevralda bankın aktivləri 1,61 faiz artaraq 192,32 milyon manat olub.
Hesabat dövründə "Bank of Baku"nun depozit portfeli 194,104 milyon manat təşkil edib. Bunun 141,04 milyonu fiziki şəxslərin əmanətləri, 134,772 milyon manat isə orta depozitlərin payına düşür.
Bankın kredit portfeli 197,209 milyon manat təşkil edib. Kredit portfelində istehlakçı kreditlərinin payı martın 1-nə 141,453 milyon manat, kommersiya isə 45,654 milyon manat olub.
"Bank of Baku"nun məcmu kapitalı martın 1-nə 43,474 milyon manat, bankın ödənilmiş nizamnamə kapitalı isə 12,852 milyon manat təşkil edib.
"Bank of Baku" 2005-ci ildə iki özəl bankın - "Bank of Baku" ASC və "İlkBank" KB-nin birləşməsi nəticəsində yaranıb. Hazırda bankın səhmlərinin 40 faizi Türkiyənin NAB şirkətlər qrupuna, 10 faizi Elçin İsayevə (bankın Müşahidə Şurasının sədri), 29 faizindən çoxu "Azpetrol"a, 21 faizi isə fiziki şəxslərə və "Azİnvest" şirkətinə məxsusdur.
Martın 28-nə olan rəsmi məzənnə 0,7932 AZN/USD təşkil edir.