Azərbaycan, Bakı, 30 mart /Trend, müxbir N.İsmayılova/
Azərbaycan bankı "DəmirBank" nağdsız ödənişlər sisteminin inkişafı üzrə ölkədə həyata keçirilən dövlət proqramlarında iştirakda maraqlıdır. Bu barədə çərşənbə axşamı jurnalistlərə bankın idarə heyətinin sədri Roman Əmircanov deyib.
"Bu gün nağdsız hesablaşmalar üzrə tariflər tələb və təklif əsasında formalaşır. Hesab edirik ki, bu istiqamətdə şəffaflıq mühüm rol oynayır. Ona görə də nağdsız əməliyyatların həcmindən və bu sahədə tətbiq olunan texnologiyalardan asılı olaraq, gələcəkdə bu tariflərə yenidən baxıla bilər", - o deyib.
Bir müddət əvvəl AMB İdarə Heyətinin sədri Elman Rüstəmovun dediyi kimi, Azərbaycan Mərkəzi Bankı nağdsız əməliyyatlara keçidə marağın artırılması məqsədilə biznes-strukturlarla dialoqu fəallaşdırmağa ehtiyac görür.
"Ölkədə nağdsız əməliyyatların stimullaşdırılması məqsədilə Vergilər Nazirliyi ilə birgə işçi qrup yaradılıb. Onların iqtisadi stimullaşdırılması üçün keçirilən tədbirlər öyrənilir. İlk növbədə, bu, biznes-strukturlarla bu sistemdən onların gözləntilərini öyrənməyə və maraqlarını artırmağa kömək edən fəal dialoqdur, ikincisi, bu istiqamətdə xərclərin, eləcə də tariflərin, bankomatlar və POS-terminallar vasitəsilə aparılan əməliyyatların dəyərinin azaldılmasıdır", - Rüstəmov bildirib.
Ölkənin ilk banklarından olan "DəmirBank" (əvvəlki adı Azərdəmiryolbank) 1989-cu ildə fəaliyyətə başlayıb. Bankın səhmdarları sırasına beynəlxalq maliyyə təşkilatları olan Avropa Yenidənqurma və İnkişaf Bankı və Niderland İnkişaf Maliyyə Şirkəti (FMO) daxildir.
