Azərbaycan, Bakı, 1 aprel /Trend, müxbir İ.Xəlilova/
Özəl sektorun inkişafı üzrə İslam Korporasiyası (ICD, İslam İnkişaf Bankı (İİB) qrupuna daxildir) Azərbaycanda kiçik və orta sahibkarlığın (KOS) maliyyələşdirilməsi həcminin genişləndirilməsi ilə əlaqədar tərəfdaş bankların siyahısını artırmağı planlaşdırır. Bu barədə cümə günü Trend-ə ölkənin maliyyə dairələrindən bildiriblər.
"Korporasiya Azərbaycan banklarına KOS-un inkişafı üçün 40 milyon dollar ayırmağı planlaşdırır, - mənbə bildirib. - Bununla əlaqədar ICD ölkənin orta hesabla 5-6 bankı ilə danışıqlar aparır və onlara korporasiya ilə əməkdaşlıq üçün şərtlər göndərilib".
İstisna edilmir ki, yaxın vaxtlarda korporasiya əməkdaşlıq edəcəyi bankları müəyyənləşdirəcək. Yeni banklarla yanaşı, ICD Azərbaycanda fəaliyyət göstərən tərəfdaş bankların kreditləşdirilməsini davam etdirmək niyyətindədir.
İndiyədək korporasiya Azərbaycan iqtisadiyyatına təxminən 60 milyon manat sərmayə yatırıb. Azərbaycandakı fəaliyyəti dövründə ICD səkkiz bankla işləri nizama salıb, Azərbaycan Beyəlxalq Bankı (ABB), "RabitəBank", "UniBank", "Bank Standard", "TuranBank"a və digərlərinə kreditlər verib. Ötən ilin yayında korporasiya ABB-yə illik 9 faiz olmaqla 15 milyon dollar kredit verib.
Bununla yanaşı, korporasiya özünün törəmə müəssisələri olan "Caspian International Investment Company" (CIIC) və "Ansar Leasing" şirkəti (beş milyon manat) vasitəsilə sərmayə yatırıb.
Özəl sektorun inkişafı üzrə İslam Korporasiyası İİB-nin Direktorlar Şurası tərəfindən 1999-cu ildə Ciddədə keçirilən bankların 24-cü ənənəvi görüşündə təsis edilib. ICD-nin baş ofisi Ciddədə (Səudiyyə Ərəbistanı) yerləşir.
ICD-nin səlahiyyətlərinə üzv ölkələrin iqtisadi inkişafına şəriət prinsiplərinə uyğun özəl sektorun inkişafının dəstəklənməsi vasitəsilə yardım edilməsi daxildir. Özəl sektorun inkişafı üzrə İslam Korporasiyası özəl müəssisələrin yaradılması, genişləndirilməsi və modernləşdirilməsinə yardım edilməsi üçün hökumət və özəl qurumlara məsləhətlər də verir.
ICD-nin maliyyələşdirdiyi layihələr iş yerlərinin yaradılması və ixracın inkişafına verdiyi töhfə kimi amillər nəzərə alınmaqla, iqtisadi inkişafa göstərdiyi xidmət əsasında seçilir. ICD həmçinin öz layihələri üçün həmmaliyyəçiləri seçir və hökumət və özəl sektor qrupuna özəl müəssisələrin yaradılması, genişləndirilməsi və modernləşdirilməsinə yardım, kapital bazarının inkişafı, bazar iqtisadiyyatının idarə edilməsi və rolunun gücləndirilməsinə dəstək siyasəti üzrə məsləhətlər verir. Eləcə də ICD İİB-nin üzv ölkələrinin və milli maliyyə müəssisələrində fəaliyyətini tamamlayır.
