Azərbaycan, Bakı, 2 aprel /Trend, müxbir T.Cəfərov/
İran ilin sonunadək üç sıfırın atılması vasitəsilə milli valyutanın - İran rialının denominasiyasını aparmaq fikrindədir. Bu barədə İranın iqtisadiyyat və maliyyə naziri Seyid Şəmsəddin Hüseyni deyib. Bu barədə Trend İranın IRNA agentliyinə istinadən məlumat verir.
Hüseyninin sözlərinə görə, ölkə hökuməti Mərkəzi Bank üçün nəzarət siyasəti paketini təsdiq edib.
"Həmin paket əsasən bank sahəsində sabitlik, xərclərin azaldılması və məhsuldarlığın artırılması üçün nəzərdə tutulub", - nazir deyib.
Nazir bildirib ki, İran hökuməti daha müsbət və yaxşı nəticələr əldə etmək üçün ilk növbədə qiymət sabitliyinin təmin olunmasını, daha sonra isə milli valyutanın denominasiyasını aparmaq istəyir.
Bir müddət əvvəl İran Prezidenti Mahmud Əhmədinejad demişdi ki, milli valyutadan sıfırların götürülməsi İran rialına real dəyər verəcək.Hazırda yerli valyutanın mübadilə məzənnəsi 1979-cu ilin göstəriciləri ilə müqayisədə bir dollar üzrə 10,392 min İran rialı təşkil edir. Həmin vaxt İranda inqilab baş vermişdi. Buna qədər isə 1 dollar cəmi 70 rial dəyərində idi.
Nazirin sözlərinə görə, cari ildə bank depozitləri üzrə faiz dərəcələrinin 14-dən 12,5 faizədək azalması müşahidə olunur.
"Bununla əlaqədar digər sahələrdə də faizlərin azalacağı gözlənilir", - İranın iqtisadiyyat və maliyyə naziri deyib.