Azərbaycan, Bakı, 29 aprel /Trend, müxbir N.İsmayılova/
Neft ixrac edən ölkələr təşkilatının (OPEC) Beynəlxalq İnkişaf Fondu (OFID) Azərbaycan bankı "Amrahbank" üçün kreditin istifadə müddətini uzadıb. Bu barədə cümə günü bankdan bildirilib.
"Amrahbank" və OFİD arasında saziş çərçivəsində 2 milyon manat məbləğində kredit Azərbaycanda ticari maliyyələşdirmə üzrə əməliyyatların genişləndirilməsi məqsədilə cəlb edilib. Saziş 16 dekabr 2009-cu ildə OFİD-in Vyanadakı mənzil-qərargahında imzalanıb.
"Bank krediti 30 mart 2011-ci il tarixinədək ödəməlidir, lakin kreditorlarla danışıqlardan sonra kreditin ödənilməsi müddəti 2012-ci ilin martınadək uzadılıb", - bankdan deyilib.
Məlumata əsasən, müddətin uzadılmasına ehtiyac bankın bu vəsaitlərdən daha effektiv və uzunmüddətli istifadəsi üzrə planları ilə bağlıdır.
OFID-in vəsaitləri Azərbaycana telekommunikasiya, qida sənayesi, xalq istehlakı mallarının istehsalı sahəsində idxalla məşğul olan indiki və potensial korporativ bank müştərilərinin dəstəklənməsinə yönəldilib.
"AmrahBank" 1993-cü ildə yaradılıb. Bankın səhmlərinin 49 faizinə sahib olan Beynəlxalq İnvestisiya Bankı ilə starteji tərəfdaşlıq "Amrahbank"ın korporativ idarəetmə, beynəlxalq əməkdaşlıq, təqdim edilən məhsulların və xidmətlərin keyfiyyəti daxil olmaqla, fəaliyyətin əksər sahələrinin inkişafında əsas rol oynayıb.
