...

Azərbaycanda ixtisaslaşdırılmış ixrac bankının yaradılması təklif olunur

Biznes və iqtisadiyyat xəbərləri Materials 2 May 2011 15:35 (UTC +04:00)

Trend-i buradan izləyin

Azərbaycan, Bakı, 2 may /Trend, müxbir N.İsmayılova/

2025-ci ilədək ÜDM-də Azərbaycan banklarının depozit portfelinin xüsusi çəkisinin 2009-cu ildəki 12,4 faizdən 35 faizə çatacağı gözlənilıir. Bu barədə İqtisadi İnkişaf Nazirliyinin hazırladığı 2011-2025-ci illərdə Azərbaycanın uzunmüddətli iqtisadi inkişafı strategiyası layihəsində deyilir. 2010-cu ildə depozit portfelinin ÜDM-ə nisbəti 13,1 faiz təşkil edib.

Strategiya layihəsinə görə, bankların kredit portfelinin xüsusi çəkisinin ÜDM-də artımının 2009-cu ildəki 24,7 faizdən 2025-ci ilədək 50 faizədək olacağı gözlənilir. 2010-cu ilin yekunları üzrə bu göstərici 22 faiz təşkil edib.

Strategiya layihəsində 1000 kvadrat kilometr üzrə bankomatların sayının 20,5 ədəddən 100 ədədədək, hər 100 min nəfərə düşən bankomatların sayının isə 25,9 ədəddən 100 ədədədək artırılması planlaşdırılıb.

2011-ci il aprelin 1-nə olan məlumata görə, ölkədə 1929 bankomat fəaliyyət göstərir ki, il ərzində bu göstərici üzrə artım 214 ədəd təşkil edib. Bankomatların 1071 ədədi Bakıda, 848-i isə ölkənin digər şəhər və rayonlarında yerləşir.

Maliyyə xidmətlərinin inkişafı sahəsində əsas tədbirlər arasında bank sistemində bankların birləşdirilməsi üzrə tədbirlərin və bank sistemi üçün əhəmiyyətli təkrar strukturlaşdırmanın aparılması, bankların stress-testlər üzrə potensialının artırılması, bu sahədə vahid modelin yaradılması, risk-menecmenti üzrə pilot inkubator bankların yaradılması, bank nəzarəti alətlərinin təkmilləşdirilməsi və bildiriş sistemlərinin birləşdirilməsinə xüsusi yer ayrılır. 2025-ci ilədək korporativ idarəetmə sisteminin və yeni prudensiual hesabatglılıq sisteminin genişləndirilməsi, ödəniş sistemlərinin və kart ödəniş sistemlərinin inkişafı, əhalinin AzSSR-in Əmanət bankındakı əmanətlərinin indeksləşdirilməsi, onların qaytarılması və əhalinin bank sektoruna etimadının yüksəldilməsi, kredit ittifaqlarının fəaliyyətlərinin stimullaşdırılması məqsədilə qanunvericiliyin təkmilləşdirilməsi, dövlət kredit reyestrinin fəaliyyətinin gücləndirilməsi və borcların keyfiyyətinin yaxşılaşdırılması nəzərdə tutulur.

Strategiya layihəsində habelə ixracın stimullaşdırılması, sahibkarların ixrac əməliyyatlarını həyata keçirmələri məqsədilə ixrac əməliyyatlarının maliyyələşdirilməsi üzrə ixtisaslaşdırılmış bankın yaradılması da nəzərdə tutulur. Həmçinin, qiymətli kağızlar bazarının peşəkar iştirakçılarının fəaliyyətinin prinsiplərinin təkmilləşdirilməsi, onlar üzərində nəzarət mexanizmi və qanunvericilik bazasının təkmilləşdirilməsi təklif olunur ki, bu da sərmayədarlar üçün bazarın cəlbediciliyinin artmasına gətirib çıxaracaq.

Bu gün Azərbaycanda 45 bank fəaliyyət göstərir ki, onlardan biri dövlət, 44-ü isə özəl kommersiya bankıdır.

Strategiya layihəsi Azərbaycan Prezidenti İlham Əliyevin 2009-2013-cü illərdə ölkə regionlarının sosial-iqtisadi inkişafı ikinci Dövlət Proqramının icrasının birinci ilinin yekunlarına həsr olunmuş konfransda verdiyi tapşırıq və göstərişlər əsasında hazırlanıb.

Xəbər lenti

Xəbər lenti