Azərbaycan, Bakı, 2 may /Trend, müxbir A.Axundov/
Azərbaycanın sığorta şirkəti "Meqa Sığorta" kənd təsərrüfatı sahəsində sığortaya xüsusi diqqət yetirir. Bu barədə Trend-ə bazar ertəsi şirkətin PR meneceri Elnur Eyvazov deyib.
"Hazırda kənd təsərrüfatı sahəsində sığorta Azərbaycanın sığorta bazarının perspektiv istiqamətlərindən biridir", - Eyvazov bildirib.
Onun sözlərinə görə, şirkət regionlarda filiallarının fəaliyyəti bərpa edildikdən sonra sığortanın bu növü üzrə fəal işləməyə başlayacaq.
"Bizim regionlarda 5 filialımız var. Rebrendinqdən sonra onlar müvəqqəti olaraq öz fəaliyyətlərini dayandırıblar. Onlar fəaliyyətlərini bərpa edən kimi, biz kənd təsərrüfatının sığortası üzrə işləməyə başlayacağıq", - Eyvazov əlavə edib.
"Meqa Sığorta" şirkəti yeni brendlə 2010-cu il oktyabrın 1-dən fəaliyyətə başlayıb və sığorta xidmətlərinin 29 növünün, o cümlədən 4 icbari növünün göstərilməsinə lisenziyası var.
Azərbaycan Maliyyə Nazirliyi yanında Dövlət Sığorta Nəzarəti Xidmətinin məlumatına görə, birinci rübdə şirkət sıfır ödənişlə 36,2 min manat yığıb.
Eyvazovun sözlərinə görə, şirkət əhalinin bu istiqamət üzrə sığortaya marağının cəlb edilməsinə dair işlər aparır.
"Aidiyyəti dövlət qurumları, eləcə də bu sahədə işləyən şirkətlər, xüsusilə, lizinq şirkətləri əhali arrasında maarifləndirmə işini uğurla aparsalar, bu növ çox perspektivlidir. Həm də ölkə regionlarında ötənilki təbii fəlakət ona marağı artırıb", - Eyvazov bildirib.
Mayın 2-nə olan rəsmi məzənnə 0,7916 AZN/USD təşkil edir.
