Azərbaycan, Bakı, 4 may /Trend, müxbir A.Axundov/
Martın 31-nə olan vəziyyətə görə "AtaLizinq" ASC-nin lizinq portfeli 4,017 milyon manat təşkil edib ki, bu da 2010-cu ilin analoji dövrü ilə müqayisədə 14,6 faiz azdır. Bu barədə çərşənbə günü şirkətin məlumatında deyilir. Ötən ilin göstərilən dövründə şirkətin portfeli 4,704 milyon manat təşkil edib.
İlin birinci rübünün sonunda qüvvədə olan lizinq müqavilələrinin sayı 127 ədəd təşkil edib ki, ötən ilin analoji dövründə onların sayı 105 ədəd olub.
2011-ci il martın 31-nə şirkətin lizinq portfelinin 88,62 faizi Bakı şəhərinin, yerdə qalan 11,38 faiz isə regionların (Xaçmaz, Sumqayıt, Ucar, İmişli, Mingəçevir, Lənkəran, Şabran, Şamaxı, Şəki) payına düşüb.
Portfelin sahələr üzrə göstəriciləri aşağıdakı kimidir: inşaat texnikası - 760 367 manat, sərnişin nəqliyyatı - 163 852 manat, yeyinti sənayesi - 381 977 manat, xidmət - 563 551 manat, istehlak - 621 785 manat, yük daşıma - 1 089 629 manat, istehsal - 436 344 manat.
"AtaHoldinq" ASC və "AtaBank" ASC tərəfindən təsis olunan "AtaLizinq" ASC 2004-cü ildən bir milyon manatlıq nizamnamə kapitalı ilə fəaliyyət göstərir.
Mayın 4-nə rəsmi məzənnə 0,7912 AZN/USD təşkil edir.
