Azərbaycan, Bakı, 17 may /Trend, müxbir A.Axundov/
Apreldə Bakının təkrar mənzil bazarında orta qiymətlər 1,8 faiz ucuzlaşaraq, bir kvadratmetr üçün 1296 dollara düşüb. Bu barədə çərşənbə axşamı Trend-ə "MBA Group" Konsaltinq Şirkətinin baş direktoru Nüsrət İbrahimov bildirib. Təkrar mənzillərin qiyməti ilin əvvəlindən 1,8 faiz aşağı düşüb, ötən ilin analoji dövrü ilə müqayisədə 2,6 faiz ucuzlaşıb.
Ekspertin hesablamalarına görə, apreldə ilkin mənzil bazarında qiymətlər 1,3 faiz artaraq bir kvadrat metr üçün 826 dollar təşkil edib. İlin əvvəlindən qiymətlər 0,2 faiz, ötən ilin analoji dövrü ilə müqayisədə isə 1,5 faiz artıb.
Apreldə Bakının kommersiya obyektləri bazarında qiymətlər 0,3 faiz qalxaraq 1 kvadratmetr üçün 3 203 dollar təşkil edib. Ötən il və ilin əvvəlinə nisbətdə qiymətlər müvafiq olaraq 3,9 və 3,5 faiz azalıb.
Ötən ay Bakının torpaq bazarında da qiymətlər cüzi bahalaşıb - 0,3 faiz qalxaraq bir sot üçün 18 510 dollar təşkil edib. Ötən ilin analoji dövrü və ilin əvvəli ilə müqayisədə qiymətlər müvafiq olaraq 10,8 və 6,5 faiz aşağı düşüb.
Ötən ay Bakıda mənzillərin icarəyə verilmə qiyməti 2 faiz bahalaşaraq bir mənzil üçün 676 dollaradək artıb. Ötən ilin analoji dövrü və ilin əvvəli ilə müqayisədə qiymətlər müvafiq olaraq 2 və 0,1 faiz aşağı düşüb.
Ay ərzində qeyri-yaşayış obyektlərinin icarəsi 5,1 faiz ucuzlaşaraq bir kvadrat metr üçün 19,4 dollar olub. İlin əvvəlindən qiymətlər 6,1 faiz, il ərzində isə 8,3 faiz düşüb.