Azərbaycan, Bakı, 18 may /Trend, müxbir İ.Xəlilova/
Asiya İnkişaf Bankı (AİB) iyunun ikinci yarısında Azərbaycan hökuməti ilə "Masallı-Astara" avtomobil yolunun tikintisi layihəsi üçün əlavə maliyyələşmənin ayrılması ilə bağlı rəsmi danışıqlar aparmağı planlaşdırır. Bu barədə bankın Bakı nümayəndəliyindən məlumat verilib.
"Hazırda texniki detallar, eləcə də avtomobil yolunun kənarındakı torpağın alınması üzrə planın yenilənməsinin zəruriliyi dəqiqləşdirilir, ətraf mühitə təsir müzakirə edilir", - nümayəndəlikdən deyilib.
AİB layihənin reallaşdırılması üçün əlavə olaraq 160-170 milyon ayıracaq.
Maliyyələşmə Azərbaycandakı yol layihələri üçün 2007-ci ilin avqustunda 500 milyon manat məbləğində təsdiqlənmiş üçüncü multitranş paketindən (Multitranche Financing Facility - MFF) həyata keçiriləcək. Əvvəllər MFF-nin üçüncü krediti Gəncə-Qazax avtomobil yolunun şərq-qərb hissəsinin modernləşdirilməsi üçün nəzərdə tutulmuşdu. Lakin Masallı-Astara yolunun tikintisi layihəsinin əlavə maliyyələşdirilmə zərurəti ilə əlaqədar onun reallaşdırılmasının sürətləndirilməsi üçün bu layihəyə vəsait ayrılması qərar alınıb.
Layihənin ümumi dəyəri 400 milyon dollardan artıqdır. Masallı-Astara yolunun yenidən qurulmasına bank artıq 200 milyon dollar ayırıb, Azərbaycan hökumətinin iştirak payı isə 49 milyon dollar təşkil edib. Bank tərəfdən əlavə maliyyələşdirmə (160 milyon dollar) və hökumətin iştirak payı (20-25 faiz) nəzərə alınmaqla layihənin ümumi dəyəri 450 milyon dollara çatır.
Yolun birinci hissəsinin tikintisi üçün "Azərinşaatservis" tikinti şirkəti seçilib, qalan iki hissə üçün tender proseduru apreldə başa çatacaq. Layihənin bahalaşması ilə əlaqədar məsləhətçi 2008-ci ildə hazırlanan xərclər smetasına müvafiq dəyişikliklər etməlidir. Layihənin yenidən qiymətləndirilməsindən sonra onun dəyəri 400 milyon dolları ötə bilər.
AİB-in multitranş paketindən artıq 255,4 milyon dollar ayrılıb. 200 milyon dollar məbləğində olan birinci tranş Masallı-Astara avtomobil yolunun tikintisinə, ikincisi isə (55,4 milyon dollar) Gəncə dairəvi yolunun yenidən qurulmasına ayrılıb.
MFF-nin bütün paketinin mənimsənilməsi 2014-cü ilədək nəzərdə tutulub.
