Azərbaycan, Bakı, 19 may /Trend, müxbir A.Axundov/
Azərbaycan Sığortaçılar Assosiasiyası iyulun 7-8-də Bakıda keçiriləcək II Beynəlxalq sığorta forumunun proqramının hazırlanması üzrə iş aparır. Bu barədə Trend-ə cümə axşamı ASA-nın icraçı direktoru Azər Əliyev deyib.
"İndi spikerlərin müəyyənləşdirilməsi üzrə fəal iş aparılır. Biz istəyirik ki, bunlar yaxın və uzaq xaricin iri sığorta şirkətlərinin və ya sığorta biznesi ilə bağlı olan şirkətlərin nümayəndələri olsun", - Əliyev qeyd edib.
Onun sözlərinə görə, Bakı Biznes Mərkəzində keçiriləcək forumun sponsoru qismində 12 yerli sığorta şirkəti çıxış edir. Bunlar təkrar sığorta şirkəti "AzRe", həyat sığortası üzrə şirkətlər "Atəşgah Həyat" və "Paşa Həyat", sığorta şirkətləri "AXA MBASK", "AZAL Sığorta", "Azərbaycan Sənaye Sığorta", "A-Group", "Başak İnam", Beynəlxalq Sığorta Şirkəti, "Qarant Sığorta", "Standard Insurance" və Dövlət Kommersiya Sığorta Şirkəti "AzərSığorta"dır.
"Baş sponsorlar "AzRe" və Beynəlxalq Sığorta Şirkətidir. Forumun digər sponsoru bizə tədbirin təşkilində kömək edən Rumıniyanın PR-agentliyi MediaX PRIMM-dır. Şirkətlərin əsas fəaliyyət istiqamətləri - Mərkəzi və Şərqi Avropa bazarlarıdır", - Əliyev vurğulayıb.
Onun sözlərinə görə, forumun əsas mövzularından biri sığortanın icbari növləri üzrə qanunlar olacaq. Belə ki, Azərbaycanda bu istiqamətdə fəal iş aparılır.
"Sığortanın icbari növlərinin forumda müzakirəsi və bəzi nüanslarının açılması hamı üçün vacibdir. Burada həm sığortaçılarda, həm də bu qanunların aid olacağı şəxslərdə çoxlu suallar var", - Əliyev bildiirb.
2010-cu ilin iyulunda Azərbaycan Prezidenti İlham Əliyev "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında" qanunu təsdiq edib. Hazırda Milli Məclisdə "Sığortanın icbari növləri haqqında" qanun layihəsi üçüncü oxunuşda müzakirə edilir.
ASA-nın icraçı direktorunun sözlərinə görə, ikinci mövzu inkişafı istehsalatda icbari sığortanın tətbiqi sayəsində güclənən həyat sığortası sahəsinə həsr ediləcək.
"İndi həyat sığortası bazarı tez artır, lakin bu halda bu bazarda işləmək üçün müəyyən biliklər lazımdır. Həyat sığortası "non-life" sığortadan ciddi şəkildə fərqlənir. Buna görə də işin qurulması, məhsulların satışı, müəyyən məhsul xətlərinin yaradılması üzrə təcrübənin öyrənilməsi lazımdır. Bu təcrübəyə malik insanlara qulaq asın, bu, hamıya xeyirli olacaq", - Əliyev əlavə edib.
2011-ci ilin yanvar-aprelində Azərbaycan sığorta şirkətlərinin həyat sığortası üzrə sığorta haqları 10 milyon manata yaxınlaşıb (istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə 8,7 milyon manat, həyat sığortasının könüllü sığortası üzrə 1,15 milyon manat yığılıb). Halbuki 2010-cu ilin yekunları üzrə həyat sığortası üzrə cəmi 1,457 milyon manat yığılmışdı.
Hazırda Azərbaycanda istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta sahəsində həyat sığortası üzrə xidmətlərin göstərilməsinə lisenziyaya malik 3 şirkət fəaliyyət göstərir. Bunlar "Atəşgah Həyat", "Qala Həyat" və "Paşa Həyat" şirkətləridir.
Əliyevin sözlərinə görə, forumun digər əsas mövzusu banklar vasitəsilə sığorta məhsullarının satışı üzrə imkanların genişləndirilməsi olacaq.
"Biz forumda iştirak üçün bütün bankların nümayəndələrini dəvət etmək istəyirik. Onların fikirləri dinləniləcək. Sığortaçılar öz növbəsində bankların sığorta şirkətləri ilə işində hansı potensiala malik olmaları barədə danışacaqlar", - Əliyev qeyd edib.
Onun sözlərinə görə, hazırda Avropada bankların gəlirinin orta hesabla 25 faizi sığorta şirkətləri ilə əməkdaşlığın payına düşür.
"Azərbaycanda bu gəlirlər əlbəttə ki, çox azdır. Lakin bununla belə, artım üçün yaxşı potensial var", - Əliyev vurğulayıb.
2008-ci il iyulun 10-11-də Bakıda Azərbaycan Maliyyə Nazirliyinin dəstəyi və Azərbaycan Sığortaçılar Assosiasiyasının təşkilatçılığı ilə ilk Beynəlxalq sığorta forumu keçirilib.
Forum Azərbaycanın sığorta bazarının inkişaf tendensiyaları, Avropa ölkələrinin sığorta bazarının Azərbaycan sığorta sektorunun inkişafına təsiri, həyat sığortasının inkişafı, ölkənin maliyyə sisteminin hissəsi kimi sığorta bazarının təhlilinə və sığortada korporativ idarəetmə məsələlərinə həsr olunub.
2009-cu ildə ikinci sığorta forumunun keçirilməsi təxirə salınmışdı. ASA-nın bu qərarı dünya sığorta bazarının əhəmiyyətli dərəcədə azalması ilə bağlı olub.
Azərbaycanda 28 sığorta və bir təkrar sığorta şirkəti fəaliyyət göstərir. Şirkətlərin hamısı ASA-nın üzvləridir. Azərbaycan Sığortaçılar Assosiasiyası 2006-cı ilin dekabrında təsis olunub.
Mayın 19-na olan rəsmi məzənnə 0,7903 AZN/USD təşkil edir.
