Azərbaycan, Bakı, 3 iyun /Trend, müxbir N.İsmayılova/
Azərbaycan Beynəlxalq Bankı (ABB) OPIC (Overseas Private Investment Corporation, USA) ilə özünün ipoteka proqramının maliyyələşdirilməsi məqsədilə kredit xəttinin cəlb edilməsi üçün danışıqlar aparır. Bu barədə cümə günü Trend-ə ABB-nin idarə heyətinin sədri Cahangir Hacıyev deyib.
"Biz ilin sonunadək danışıqları başa çatdırmağa və gələn ildən etibarən bu layihənin uğurla həyata keçirilməsinə ümid edirik", - Hacıyev bildirib.
Bankdan verilən məlumata görə, ABB Azərbaycanda ipotekanın maliyyələşdirilməsi üçün ABŞ-ın özəl investisiyalarını cəlb etməyi planlaşdırır, eləcə də regionun Gürcüstan kimi ölkələrində mənzilin alınmasının maliyyələşdirilməsi imkanlarını nəzərdən keçirir. Gürcüstanda bankın törəmə şirkəti fəaliyyət göstərir.
Hazırda 100 milyon dollara yaxın vəsaitin cəlb edilməsi ilə bağlı danışqılar aparılır. ABB-nin proqramı çərçivəsində ipoteka kreditlərinin faiz dərəcələri Azərbaycan İpoteka Fondunun faizlərindən çox ola bilər, çünki bunlar özəl vəsaitlər olacaq. Lakin bank ABŞ investorlarından daha aşağı faiz dərəcələri ilə cəlb etmək üçün digər variantları nəzərdən keçirir. ABB-nin proqramı çərçivəsində ipoteka kreditinin məbləği AİF-in limitini 50 min manat ötəcək.
Hacıyevin sözlərinə görə, hazırda ABB-nin ümumi borcları 1 milyard dollara yaxındır.
ABB ötən ili 5 527,92 milyon manatlıq aktivlə başa vurub. Bu, 2009-cu ilin analoji dövr göstəricisindən 8,99 faiz çoxdur.
ABB yarıdövlət bankıdır və hazırda onun başlıca səhmdarı Azərbaycan hökumətidir. O, səhmlərin 50,2 faizinə malikdir. Səhmlərin 49,8 faizi fiziki və hüquqi şəxslərə (o cümlədən banklara) məxsusdur.
İyunun 3-nə olan rəsmi məzənnə 0,7893 AZN/USD təşkil edir.
