Azərbaycan, Bakı, 5 iyul /Trend, müxbir A.Axundov/
Beynəlxaq Maliyyə Korporasiyası (IFC) Azərbaycanın sığorta sektoru üçün izahlı lüğət hazırlayıb. Bu barədə çərşənbə axşamı Trend-ə IFC-nin Bakı ofisindən məlumat verilib.
"İzahlı lüğətin təqdimatı 7-8 iyul 2011-ci il tarixində Bakıda keçiriləcək II Azərbaycan Beynəlxalq Sığorta Forumunda olacaq", - IFC-dən bildiriblər.
İzahlı lüğət IFC tərəfindən Azərbaycan Sığortaçılar Assosiasiyası və Azərbaycan Maliyyə Nazirliyi ilə birgə hazırlanıb. Korporasiyadan bildirilib ki, sığorta terminlərinin izahlı lüğəti IFC tərəfindən ilk dəfə hazırlanır.
Azərbaycanda sığorta sektorunun formalaşması öz başlanğıcını XIX əsrin ortalarından götürsə də, Avropa standartları üzrə sığorta xidmətləri bazarının inkişafı ölkənin müstəqillik əldə etməsindən sonra başlayıb.
25 iyun 1999-cu il tarixində Milli Məclisin qərarı ilə Azərbaycanda ilk dəfə "Sığorta haqqında" qanun qəbul edildi ki, bu qanun milli sığorta bazarının formalaşması üçün hüquqi əsas yaratdı. Sığorta sektorunun fəaliyyətini tənzimləyən hüquqi baza təkmilləşməkdə davam edir və bunun əsası 2008-ci ilin martında "Sığorta fəaliyyəti haqqında" yeni qanunun qüvvəyə minməsi ilə qoyulub.
Bu gün sığorta respublikanın maliyyə sistemində ən mühüm sahələrdən biridir. Hazırda Azərbaycanda 28 sığorta və bir təkrar sığorta şirkəti fəaliyyət göstərir.
IFC yeganə beynəlxalq maliyyə təşkilatıdır ki, onun fəaliyyəti istsinasız olaraq inkişaf etməkdə olan bazarların davamlı inkişafının mühərriki olan özəl sektorun inkişafına yönəlib.
BİYB ilə yanaşı, IFC hazırda yoxsul və inkişaf etməkdə olan ölkələrdə kiçik və orta sahibkarlığın inkişafı üçün kapitalın toplanması və onların tezliklə böhrandan sonrakı bərpasına nail olmaq imkanlarını axtarır.
