Azərbaycan, Bakı, 14 iyul /Trend/
2015-ci ilədək Bakı Metropoliteni 5 yeni stansiyanı istismara verməyi planlaşdırır. Trend-in məlumatına görə, bu barədə Bakı Metropoliteninin rəhbəri Tağı Əhmədov "Respublika" qəzetinə müsahibəsində bildirib.
2011-ci ildən 2015-ci ilədək olan dövrdə cəmi altı metrostansiyanın istismara verilməsi planlaşdırılıb ki, onlardan biri də artıq fəaliyyət göstərən "Dərnəgül" stansiyasıdır.
Onun sözlərinə görə, metronin iki stansiyasının 2013-cü ilədək, qalan üçünün isə 2015-ci ilədək istismara verilməsi planlaşdırılır.
Əhmədovun sözlərinə görə, habelə, bu ilin avqust ayının 1-dək Fransanın "Systra" şirkəti Bakı Metropoliteninə "Avtovağzal" stansiyasından "Memar Əcəmi-2" stansiyasınadək xətlərin koordinatlarını verəcək.
Bakı Metropoliteninin 2030-cu ilədək əvvəllər təsdiqlənmiş inkişaf proqramı çərçivəsində metrostansiyaların sayı 79-a, istismar xətlərinin uzunluğu isə 119 kilometrə çatdırılacaq.
Hazırda Bakı Metropoliteninin stansiyalarının sayı 23-dür.