...

Dövlət BOKT Azərbaycanda IFAD və İİB-in yeni kənd təsərrüfatı layihəsində iştirak etməyi planlaşdırır

Biznes və iqtisadiyyat xəbərləri Materials 27 İyul 2011 20:40 (UTC +04:00)

Azərbaycan, Bakı, 27 iyul /Trend, müxbir A.Axundov/

Bank olmayan kredit təşkilatı "Aqrar Kredit" İslam İnkişaf Bankının (İİB) və BMT-nin Kənd Təsərrüfatının İnkişafı üzrə Beynəlxalq Fondunun (IFAD) maliyyələşdirdiyi "Azərbaycanda kənd təsərrüfatının inteqrasiyası" yeni layihəsində iştirak etməyi planlaşdırır. Bu barədə çərşənbə günü Trend-ə "Aqrar Kredit"in idarə heyətinin sədri Məmməd Musayev deyib.

"Biz artıq IFAD-ın ölkənin şimal-şərq və şimal-qərb regionlarında aqrar sektorun inkişafının dəstəklənməsi üzrə iki layihəsində iştirak edirik. Üçüncü layihə çərçivəsində biz müvəkkil kredit təşkilatlarının müəyyənləşdirilməsi üçün tenderdə iştiraka hazırlaşırıq. Bizim IFAD ilə münasibətlərimiz normaldır, onlar bizim fəaliyyətimizin monitorinqini aparıblar və onu müsbət qiymətləndiriblər", - Musayev qeyd edib.

Onun sözlərinə görə, şimal-şərq layihəsi çərçivəsində təşkilat 4 rayonda - Abşeron, Siyəzən, Xızı, Şabran rayonlarında, şimal-qərb layihəsi çərçivəsində isə Şəmkir, Tovuz, Ağstafa və Qazax rayonlarında kreditlər verir.

"Şimal-qərb layihəsinin büdcəsi bir qədər böyükdür və onun çərçivəsində biz 4 milyon dollar məbləğində kredit portfelimiz var. Biz bundan artıq 2 milyon dolları xərcləmişik. Qalan hissəni ilin sonunadək verməyə çalışacağıq. Digər layihə çərçivəsində 1 milyon dollara yaxın vəsaitin verilməsi planlaşdırılıb. Burada biz demək olar hamsını vermişik, indi qaytarılan vəsaitlərdən təkrar veririk", - Musayev əlavə edib.

Onun sözlərinə görə, şimal-qərb layihəsi üzrə problemli kreditlərin payı 3 faizə, şimal-şərq layihəsi üzrə isə 1 faizə yaxındır.

"Bu layihələr çərçivəsində biz 5 mindən çox sahibkara kredit vermişik. Bu layihələr üzrə kreditlərin qaytarılması çox yaxşıdır - 97-98 faizdir", - Musayev bildirib.

Onun sözlərinə görə, ilin sonuna "Aqrar Kredit"in kredit portfeli 20 milyon manata yaxın olub. Hazırda o, artıq 16 milyon manatı ötür.

"Biz kreditləri öz vəsaitlərimiz, SKMF-in kreditləri və beynəlxalq təşkilatların maliyyələşdirikləri layihələr çərçivəsində olan vəsaitlər hesabına veririk", - Musayev əlavə edib.

İyunun sonunda "Azərbaycanda kənd təsərrüfatının inteqrasiyası" layihəsi üzrə kredit sazişi imzalanıb. İslam İnkişaf Bankı layihənin həyata keçirilməsinə 66,4 milyon dollar ayırıb.

İİB krediti 3 hissədən ibarətdir. Onlardan ikisi güzəştli şərtlərlədir: 14,89 milyon dollar 5 illik güzəşt dövrü, 2,65 faiz dərəcəsi ilə 20 ilə; 2 milyon dollar - bank xidməti ilə (ödəniş hələ ki müəyyən edilməyib) 7 il ödəniş müddəti, güzəştli olmaqla 25 ilə; 49,51 milyon dollar 2 illik güzəşt dövrü və swap+1,2 faiz dərəcəsi ilə istisna üsulu ilə 15 ilə verilir.

Layihənin ümumi dəyəri 103,8 milyon dollardır. Bu layihənin maliyyələşdirilməsində BMT-nin Kənd Təsərrüfatının İnkişafı üzrə Beynəlxalq Fondu (IFAD) da iştirak edir. O, 19,35 milyon dollar ayırıb.

Layihə ölkənin 4 şimal və mərkəzi regionunda - Yevlax, Ağdaş, Şəki və Oğuzun 50 min kənd ailəsinə yardım etməlidir. Layihənin komponentlərindən biri irriqasiya sisteminin yaxşılaşdırılmasıdır. Fermerlər kreditlərdən istifadə edə biləcəklər və kənd təsərrüfatının idarə edilməsi sahəsində biliklərini təkmilləşdirə biləcəklər.

Azərbaycan 1992-ci ildən İslam İnkişaf Bankının üzvüdür və bu günə İİB-in ölkə üzrə portfeli 540 milyon dolları ötür. Bu vəsaitlər iqtisadiyyatın müxtəlif sahələrində layihələrin həyata keçirilməsinə ayrılıb.

1997-ci ildən etibarən IFAD Azərbaycanda kənd təsərrüfatının inkişafı sahəsində bir sıra proqramlar həyata keçirib. Əməkdaşlığa başlayandan bəri Azərbaycan IFAD xətti ilə 40 il müddətinə 20 il ödəniş edilməklə və illik 0,75 faizlə güzəştli maliyyələşdirmə alıb.

IFAD-ın Azərbaycanda investisiyalarının ümumi həcmi 87 milyon dollar təşkil edir.

"Aqrar Kredit"in əsas səhmdarı 99,9 faiz səhmə malik olan Azərbaycan Maliyyə Nazirliyidir. Qalan hissə isə bərabər olaraq "AzərSığorta" dövlət sığorta şirkəti ilə "Meliorasiya və Su Təsərrüfatı" ASC arasında bölüşdürülüb. "Aqrar Kredit" BOKT-nin nizamnamə kapitalı 18,5 milyon manat təşkil edir.

İyulun 27-nə olan rəsmi məzənnə 0,7863 AZN/USD təşkil edir.

Xəbər lenti

Xəbər lenti