Azərbaycan, Bakı, 2 avqust /Trend, müxbir A.Bədəlova/
Bank olmayan kredit təşkilatı "FINCA Azerbaijan" gələn ilin sonuna banka çevrilmək üzrə planların həyata keçiriləcəyini gözləyir. Bu barədə Trend-ə çərşənbə axşamı "FINCA Azerbaijan"ın baş icraçı direktoru Maniş Sane deyib.
Onun sözlərinə görə, banka çevrilmək prosesini iki ildən az müddətdə başa çatdırmaq FINCA-nın marağındadır, lakin təşkilatdan asılı olmayan amillər var. Bu amillər bu prosesi yubadır və konkret müddət haqqında danışmağa imkan vermir.
"Bununla belə, biz ümid edirik ki, buna [banka çevrilməyə] artıq gələn ilin sonuna nail ola biləcəyik", - Sane bildirib.
Banka çevrilmək üçün "FINCA Azerbaijan" Azərbaycan Mərkəzi Bankına bank fəaliyyəti üçün lisenziyanın alınması ilə bağlı müraciət edib.
Sanenin sözlərinə görə, bu proses ona görə yubanır ki, Mərkəzi Bank ölkənin bank sisteminin optimallaşdırılması sahəsində işi hələ başa çatdırmayıb.
"Azərbaycanın bank sektoru genişdir - ölkədə 44 bank fəaliyyət göstərir. Bu bankların fəaliyyətinin optimallaşdırılması üçün Mərkəzi Bank tərəfindən böyük iş görülür. Bu, bizim banka çevrilməklə bağlı planlarımızın həyata keçirilməsini bir qədər yubadır", - o qeyd edib.
Sanenin sözlərinə görə, "FINCA Azerbaijan" banka çevrilmək üçün güclü və uğurlu namizəddir və buna ölkədəki böyük müştəri bazası [müştərilərin sayı artıq 100 mini ötüb], Azərbaycanın bütün ərazisini əhatə edən böyük filal şəbəkəsi, eləcə də hazırda müasir bank prqoram təminatına malik olma kimi amillər sübutdur.
"FINCA Azerbaijan" ölkənin aparıcı bank olmayan kredit təşkilatlarından biri olmaqla 1998-ci ildə ABŞ-ın Beynəlxalq İnkişaf Agentliyinin (USAİD) dəsətəyi ilə yaradılıb. O, dünyanın 22 ölkəsində fəaliyyət göstərən "Finka International"ın mikromaliyyə strukturudur.
Təşkilatın banka çevrilməsi müştərilərə kreditlərlə yanaşı, digər maliyyə xidmətlərini - pul köçürmələri, depozitlərin qəbulunu həyata keçirməyə imkan verəcək.