Azərbaycan, Bakı, 17 avqust /Trend, müxbir N.İsmayılova/
İqtisadi İnkişaf Nazirliyinin Sahibkarlığa Kömək Milli Fondu (SKMF) 2012-ci ildə agentlərinin sayının artırılması istiqamətində fəaliyyətini aktivləşdirəcək. Bu barədə çərşənbə günü fondun icraçı direktoru Şirzad Abdullayev deyib.
"Biz kredit müəssisələrinin - fondun agentlərinin sayının artırılmasında maraqlıyıq və mütəmadi olaraq banklarla müzakirələr aparırıq. Bu istiqamətdə əsas məsələ onların fəaliyyətinin və risklərin olmasının öyrənilməsidir", - Abdullayev qeyd edib.
Onun sözlərinə görə, SKMF gələcəkdə agentlərin - bank olmayan kredit təşkilatlarının sayını artırmağı planlaşdırır.
Hazırda 31 bank, 1 bank olmayan kredit təşkilatı və 7 kredit ittifaqı fondun müvəkkil kredit təşkilatlarıdır.
2011-ci ildə SKMF 92,1 milyon manat məbləğində cəmi 1102 kredit verib. Bu vəsaitlər dəyəri 77,4 milyon manat olan 57 iri və 14,7 milyon manat məbləğdə 1045 kiçik layihənin həyata keçirilməsinə yönəldilib.
SKMF 1992-ci ildə yaradılıb. Sahibkarlara kreditlərin verilməsi səlahiyyətli banklar və bank olmayan kredit təşkilatları vasitəsilə həyata keçirilir. Onların ümumi sayı 39-dür.
Avqustun 17-nə olan rəsmi məzənnə 0,7865 AZN/USD təşkil edir.
