Azərbaycan, Bakı, 2 sentyabr /Trend, müxbir N.İsmayılova/
2011-ci ilin sonuna kimi Almaniya İnkişaf Bankı KfW Azərbaycan üzrə maliyyə layihələri üçün yeni menecer təyin edəcək.
Bank maliyyə layihələri üzrə menecer Herald Hüngerin rəhbərliyi ilə KfW nümayəndə heyətinin Bakıya səfəri zamanı yeni meneceri Azərbaycan hökümətinə təqdim etməyə hazırlaşır. Trend-in məlumatına görə, bu barədə cümə günü KfW-nin Bakı nümayəndəliyindən bildiriblər. Səfər sentyabrın 23-30-da baş tutacaq.
Nümayəndə heyətinə bu ilin sonunda Hüngerin yerinə keçəcək Kurt Ştrasser, həmçinin özəl və maliyyə sahələrinin inkişafı departamentinin rəhbəri Mixael Merşel də daxildir.
Ştrasser bankın ölkədəki fəaliyyəti ilə tanış olacaq, Azərbaycan Mərkəzi Bankında və KfW ilə əməkdaşlıq edən banklarda bir sıra görüşlər keçirəcək. Həmçinin, Almaniya bankının nümayəndələri 20 faiz hissələri KfW-yə aid olan "AccessBank" təsisçilərinin iclasında da iştirak edəcək.
Azərbaycanın KfW ilə əməkdaşlığı 1994-cü ildən başlayıb. Əməkdaşlıq başlanandan KfW Azərbaycan layihələrinin güzəştli maliyyələşdirilməsinə üstünlük verib (40 il müddətinə 10 ili güzəştli olmaqla və illik 0,75 faizlə), lakin son illər bank qarışıq kreditlərə daha çox üstünlük verir. Bankın ölkədə strateji fəaliyyət istiqamətləri enerji, su və digər infrastrukturun bərpası, maliyyə, bank, özəl sektorun, səhiyyə sisteminə, ətraf mühit və s. inkişafına dəstək verməkdir. Azərbaycan üzrə portfel hazırda 200 milyon avroya çatır.