Azərbaycan, Bakı, 12 sentyabr /Trend, müxbir A.Abbasov/
Gələn il Azərbaycanda gömrük tariflərinə yenidən baxılması gözlənilmir. Trend-in məlumatına görə, bunu jurnalistlərə Dövlət Gömrük Komitəsinin rəhbəri Aydın Əliyev deyib.
"Gələn il gömrük tariflərinə yenidən baxılması ilə bağlı hazırda heç bir məsələ müzakirə olunmur", - Əliyev deyib.
Onun sözlərinə görə, DGK gələn il dövlət büdcəsinə daxilolmaların həcminin proqnozlaşdırılması üzrə işlərə başlayıb.
"Komitə gələn il üçün dövlət büdcəsinə daxilolmaların həcminin proqnozlaşdırılması üzrə işlərin ilkin mərhələsindədir", - Əliyev bildirib.
2011-ci il üzrə DGK xətti ilə daxilolmalar 1,14 milyard manat məbləğində proqnozlaşdırılıb.
Ötən il DGK proqnozu 100,16 faiz yerinə yetirərək dövlət büdcəsinə planlaşdırılan 1,1 milyard manata qarşı 1 milyard 101,73 milyon manat vəsait köçürüb.