Azərbaycan, Bakı, 13 sentyabr /Trend, müxbir A.Axundov/
2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı çərçivəsində infrastruktur layihələrin həyata keçirilməsi şəhər ətrafındakı kommersiya obyektləri bazarının aktivliyini xeyli canlandıra bilər. Trend-in məlumatına görə, bu barədə Əmlak Məsələləri Dövlət Komitəsinin nəşr etdirdiyi "Daşınmaz Əmlak" jurnalında dərc olunmuş məqalədə deyilir.
"Kommersiya obyektləri bazarının aktivliyinə təsir göstərən əsas amillərdən biri avtomobil yollarının qaydaya salınmasıdır", - "İdeya" əmlak şirkətinin eksperti Samir Kazımov bildirib.
Proqram çərçivəsində Heydər Əliyev Beynəlxalq hava limanı-Mərdəkan dairəsi-Bilgəh qəsəbəsi avtomobil yolunun yenidən qurulması, Bilgəh-Novxanı-Sumqayıt yolunun tikintisi, Qala qəsəbəsi ilə Zığ dairəsindən aeroportadək və digər yolların birləşdirilməsi nəzərdə tutulur.
"Kommersiya obyektləri bazarının aktivliyi 25-30 faiz, daşınmaz əmlakın qiyməti isə 10-18 faiz arta bilər. Lakin ayrı-ayrı obyektlər üzrə qiymətlər müxtəlif ola bilər", - ekspertlər hesab edir.
Məsələn, Kazımovun sözlərinə görə, kiçik kommersiya obyektləri üçün yolların yaxşılaşdırılması bir o qədər də vacib deyil.
"İnsanlar bu obyektlərə uzaqdan gəlmirlər, ona görə də belə obyektlərdə ciddi qiymət artımları gözlənilmir. Bu, 2-3 faiz ola bilər. Eyni zamanda, iri istirahət mərkəzlərinin və hotellərin dəyəri 14-16 faiz bahalaşa bilər", - o deyib.