Azərbaycan, Bakı, 15 sentyabr /Trend, müxbir E.İsmayılov/
Yanvar-avqust aylarında Azərbaycanın nəqliyyat sektorunda 135,6 milyon ton müxtəlif yüklər daşınıb ki, bu da 2010-cu ilin yanvar-avqust aylarındakından 4,6 faiz çoxdur. Bu barədə Trend-ə cümə axşamı Azərbaycan Dövlət Statistika Komitəsindən bildirilib.
Daşınmış yüklərin ümumi həcmindən 74,4 faiz özəl sektorun payına düşür.
Bu ilin yanvar-avqust aylarında yüklərin ümumi həcminin 53,6 faizi avtomobil nəqliyyatı ilə, 30 faizi boru kəmərləri, 10,4 faizi dəmiryol və 6 faizi isə dəniz nəqliyyatı ilə daşınıb.
Yanvar-avqust aylarında 951,5 milyon sərnişin daşınıb ki, bu da ötən ilin analoji dövr göstəricisindən 7 faiz çoxdur. Sərnişinlərin əsas hissəsi (87,3 faiz) avtomobil nəqliyyatı və metro ilə (12,3 faiz) daşınıb.
Dəmiryol nəqliyyatı ilə 14,1 milyon ton müxtəlif yüklər daşınıb ki, bu rəqəm 2010-cu ilin yanvar-avqust aylarında 14,5 milyon ton olub.
Dəniz nəqliyyatı ilə 8,1 milyon ton müxtəlif yüklər daşınıb. Bu, ötən ilin yanvar-avqust aylarında olduğundan 11,2 faiz çoxdur.
Daşınan yüklərin əsas həcmi beynəlxalq əməliyyatların payına düşür. Azərbaycan limanlarında emal olunmuş yüklərin həcmi yanvar-avqustda 8 milyon ton təşkil edib ki, bu da ötən ilin analoji dövr göstəricisindən 14,2 faiz çoxdur.
Avtomobil nəqliyyatı ilə 72,6 milyon ton yük daşınıb. Bu, ötən ilin yanvar-avqust aylarındakından 9,5 faiz çoxdur.
Sərnişindaşımanın həcmi 831 milyon nəfər (artım 8,3 faiz) təşkil edib. Sərnişinlərin 96,4 faizi avtobuslarla, 3,6 faizi minik avtomobilləri ilə daşınıb.
Metropolitenlə sərnişindaşımanın həcmi 117,2 milyon nəfər təşkil edərək 0,7 faiz azalıb.
Yanvar-avqust aylarında hava nəqliyyatı ilə 926,7 min sərnişin daşınıb. Bu, ötən ilin analoji dövr göstəricisindən 38,6 faiz olub. Bu növdə daşımaların 3,1 faizi özəl sektorun payına düşüb.
Bu ilin yanvar-iyul aylarında Avrasiya nəqliyyat dəhlizi ilə Azərbaycan ərazisindən 31,3 milyon ton yük daşınıb ki, bu da ötən ilin analoji dövr göstəricisindən 6,6 faiz çoxdur. Yeddi ay ərzində dəhliz çərçivəsində 140,1 milyon sərnişin daşınıb ki, bu da 2010-cu ilin yanvar-iyul aylarında olduğundan 7,7 faiz çoxdur.